Senator ótken jyly Parlament qabyldaǵan ǵylym salasy qyzmetkerleriniń áleýmettik kepildikterin nyǵaıtýǵa baǵyttalǵan zańdar týraly aıtyp berdi. Depýtat sondaı-aq ınstıtýttyń materıaldyq-tehnıkalyq bazasymen, ıadro bólshekterin zerdeleýge qajetti quraldar jáne jabdyqtarmen, ony is júzinde qoldaný barysymen tanysty. Depýtat ıadrolyq fızıka salasyndaǵy kadrlardy qaıta daıarlaý máselesine erekshe nazar aýdardy.
«Iаdrolyq fızıka ınstıtýty qurylǵannan bergi tarıhy óte baı jáne ınstıtýt bazasynda júzege asyp jatqan strategııalyq jobalardyń mańyzy zor. Tıisinshe, ınstıtýtty sapaly kadrlarmen tolyqtyrý máselesi jáne olardy qaıta daıarlaý mekemeniń basty mindeti bolýǵa tıis», dedi senator.
Kezdesýge qatysýshylar búgingi tańda elimizdiń halqy arasynda keńinen talqylanyp jatqan atom elektr stansasyn salý taqyrybyn da qozǵady. Atom elektr stansasyn salý, ony qaýipsiz paıdalaný jáne onyń elimizge tıgizetin paıdasy máselesine elimizdiń azamattary qatty alańdaıtyny atap ótildi.
«Memleket basshysy jaqynda «Egemen Qazaqstan» gazetinde jarııalanǵan suhbatynda atap ótkendeı, atom elektr stansasyn salý – bizdiń ekonomıkamyzdyń bolashaǵy men energetıkalyq qaýipsizdigimiz úshin mańyzdy másele. Qurylys máselesi boıynsha tıisti qoǵamdyq tyńdaýlar ótkiziletin bolady. Instıtýt bul másele boıynsha árqashan aldyńǵy qatarda bolýǵa tıis jáne betke ustar mekeme retinde áreket etýi kerek dep sanaımyn», dedi Nurtóre Júsip.
Kezdesý barysynda ınstıtýtta AES úshin mamandar daıarlaýǵa arnalǵan barlyq qajetti ınfraqurylym, atap aıtqanda, VVR-K stasıonarlyq zertteý reaktory, shuǵyl áreket taqtasy, san túrli údetkishter bar ekeni, sondaı-aq úsh oqý ortalyǵy jumys isteıtini atap ótildi.
