Quramyna Qazaqstan, Tájikstan, Túrikmenstan, О́zbekstan kiretin Halyqaralyq Araldy qutqarý qory Aral teńizin saqtaýǵa jáne óńirdiń ekologııalyq jaǵdaıyn jaqsartýǵa, sondaı-aq jalpy áleýmettik-ekologııalyq problemalardy sheshýge baǵyttalǵan birlesken memleketaralyq ekologııalyq jáne ǵylymı-praktıkalyq baǵdarlamalar men jobalardy iske asyrýmen aınalysady.
«Biz Ortalyq Azııa memleketterimen, sondaı-aq basqa da halyqaralyq uıymdarmen jáne qarjy ınstıtýttarymen yntymaqtastyqty arttyrýdy kózdeımiz. Bıyl biz Dúnıejúzilik bankpen birge júzege asyrylyp jatqan Soltústik Araldy saqtaý jobasynyń ekinshi kezeńin bastaýdy josparlap otyrmyz. Aral teńizin qutqarý – HAQQ-ǵa qatysýshy barlyq eldiń birlesken kúsh-jigeri arqyly ǵana oryndalatyn mindet. Aldaǵy úsh jylda biz osy baǵytta mańyzdy nátıjelerge qol jetkizýge nıettimiz», dedi Sý resýrstary jáne ırrıgasııa mınıstri Nurjan Nurjigitov.
1993 jyldyń 26 naýryzynda HAQQ quryltaıshylary – Ortalyq Azııa elderiniń basshylary Qyzylorda qalasynda sammıtte bas qosyp, Aral teńizi jáne onyń mańyndaǵy ekologııalyq aımaqtyń áleýmettik-ekonomıkalyq damýyn qamtamasyz etý máselelerin sheshýde birlese qyzmet etý týraly málimdeme qabyldady. Aral daǵdarysy saldarlarymen kúresti Halyqaralyq Araldy qutqarý qory úılestirip otyrady. BUU-nyń Damý baǵdarlamasymen, Ekologııalyq baǵdarlamasymen, IýNESKO, Búkilálemdik bank, Azııa damý banki, TASIS uıymdarymen, sonymen qatar Germanııa, Danııa, Izraıl, Kanada, Nıderland, AQSh, Shveısarııa, Shvesııa jáne basqa da donor elder úkimetterimen birige otyryp, HAQQ aımaqtyń áleýmettik jáne ekologııalyq problemalaryn sheshýge baǵyttalǵan túrli jobalar men baǵdarlamalar júrgizip keledi.
