Osy aıtýly oqıǵaǵa oraı «AirAsia X» áýe kompanııasynyń quryltaıshysy, «Capital A» Dırektorlar keńesiniń atqarýshy tóraǵasy Datýk Kamarýdın Meranýn jýrnalıstermen kezdesip, óz josparlarymen bólisti.
«Qazaqstan men Malaızııany jaqyndastyrý armany mende erterekte paıda bolǵan. Biraq ony júzege asyrýǵa jahandyq indet úlken kedergi keltirdi. Pandemııadan keıin osy isti jandandyrýdy jalǵastyrdyq», deıdi Datýk Kamarý-
dın.
Álbette, Azııanyń iri áýe kompanııasy eki el arasynda áýe reısterin ashýǵa aıaqasty sheshim qabyldaı salmaıtyny aıan. Qazaqstannyń týrıstik áleýeti, jahan kezgendi jaqsy kóretin jerlesterimiz, eki eldi Qudaı kende etpegen kórikti mekender men marketıngtik zertteýler alǵyshart bolǵany daýsyz. Degenmen álemdik iri tasymaldaýshynyń biri saıahattaǵandy súıetin otandastarymyzǵa arzan áýebılet usyna ala ma degen saýalǵa kelsek, «Capital A» Dırektorlar keńesiniń atqarýshy tóraǵasy Datýk Kamarýdın Meranýn birinshi kezekte kompanııa bıletterdiń qoljetimdi bolýyna mán berip otyrǵanyn aıtady.
Aqıqatyna kelgende, eki el arasyndaǵy týrıstik áleýetti oıatýǵa, saýda-sattyq jáne ekonomıkalyq baılanystardy nyǵaıtýǵa Malaızııa týrıstik agenttiginiń saýda mıssııasy, Qazaqstandaǵy Malaızııa elshiligimen qosa ózge de áýe tasymaldaýshylary múddeli desek, asyra dáripteý emes. Onyń dáleli – keıingi ýaqytta deldaldyq delegasııalardyń belsendiligi. Shyǵaryp salǵanymyzǵa sanaýly ǵana kúnder ótken 2023 jyly eki el arasynda talaı mámile júrdi. Sol sııaqty «Air Asia X» kompanııasynyń jetekshileri elimizdegi ártúrli quzyrly mekememen kelissózderdi 2018 jyldan beri júrgizip keledi.
Qysqasy, 14 naýryzdan bastap Almaty men Kýala-Lýmpýr arasyndaǵy áýe reısteri aptasyna tórt (seısenbi, beısenbi, senbi, jeksenbi) ret ushady. Aıtqandaı, bul buǵan deıin eki el arasyndaǵy týrıstik baılanys bolmady degen sóz emes. Mysaly, COVID-19 bastalǵanǵa deıin 2019 jyly Malaızııaǵa Qazaqstannan 18 138 týrıst barǵan. Bul el pandemııaǵa deıin, tek 2019 jyly shetelderden 26 mln týrıst qabyldaǵan. Bir jaǵynan Malaızııanyń Qazaqstanǵa berip otyrǵan eń úlken artyqshylyǵy – 30 kúnge deıin vıza talap etilmeıdi.
Al «Air Asia Aviation Group» quramyna kiretin, 2006 jyly qurylǵan «Air Asia H» kompanııasynyń A-320, A-320neo, A-321neo jáne A-330 tıpti 270 áýe kemesi bar. Franshıza aıasynda kompanııa Malaızııany 25 memleketpen jalǵap otyr.
Qalaı desek te, Azııadaǵy iri loýkosterdiń Ortalyq Azııaǵa kelýi qaı turǵyda bolsa da mańyzdy. Malaızııanyń qaı kezde de Shyǵys Azııanyń qaqpasy ispetti, jıhankezderdi, shym-shytyryq oqıǵa, buryn aýyz tıip kórmegen as mázirin súıetinderdi ózine súıreı alatyn qyzyqtary jetip-artylady. Oǵan qosa qazaqtar da saıahatshy halyq ekendigimen tanyla bastady.
Osy oraıda Datýk Kamarýdın Meranýn: «Bul – «AirAsia X» úshin de tarıhtyń jańa taraýlary, Almaty men Kýala-Lýmpýr arasyn jalǵaı otyryp, ózimiz qurylǵaly beri 16 jyldyń ishinde birinshi ret naryqta qulash jaıǵaly otyrmyz. Biz Qazaqstanmen tikeleı reısterdi júzege asyratyn alǵashqy malaızııalyq kompanııa ekenimizdi maqtan tutamyz. Ortalyq Azııaǵa bastaǵan alǵashqy qadam, Qazaqstan naryǵyna shyǵý, pandemııadan keıin tanymal baǵyttardy jańǵyrtýda jańa aımaqtardy zertteý – áriden oılaıtynymyz ben sheshimtaldyǵymyzdyń belgisi. Al Qazaqstan Ortalyq Azııadaǵy eń baı el ekenin eskersek, Almatyǵa tikeleı reıster ashý saýda-sattyq, kommersııalyq baılanystar men bilim almasýǵa, jańa jumys oryndaryn qurýǵa aıtarlyqtaı ıgi yqpal etedi», deıdi.
Sonymen, reısterdiń qosylý qurmetine qoljetimdi promo-tarıfter bir baǵytqa 249 dollardan bastap, «Premium Flatbed» reısterinde 699 dollarǵa deıin baratynyn aıta ketýge bolady.
«Biz Qazaqstannan kelgen saıahatshylarǵa Sabahtaǵy, Kýala-Terenggan men Langkavıdegi tańǵajaıyp jaǵajaılardy, Penangtegi aspazdyq jumaqty, Saravaktaǵy IýNESKO-nyń búkilálemdik muralary men basqa da ishki baǵyttardy tamashalaýǵa múmkindik beretinimizdi maqtan tutamyz. Bizdiń fly-Thru baılanystarymyz arqyly týrıster Kýala-Lýmpýrdan Taılandtaǵy Phýketke, Krabıdegi Ońtústik-Shyǵys Azııa injý-marjandaryna, Indonezııadaǵy Balı men Lombokqa, Kambodjadaǵy Sıem Rıp, Vetnamdaǵy Saıgon syndy tańǵajaıyp ólkelerge usha alady. «Almaty – Kýala-Lýmpýr» baǵyty arqyly biz eki uly eldiń, halqy tyǵyz qonystanǵan óńirler arasyndaǵy saparlarǵa jol ashyp qana qoımaı, Qazaqstan men Malaızııa arasyndaǵy baılanystardy nyǵaıtýǵa, sondaı-aq eki eldiń áleýmettik-ekonomıkalyq sektorlaryn baıytýǵa umtylamyz», deıdi.
ALMATY
