Qol jetkizilgen ýaǵdalastyqtardyń aıasynda 2028 jylǵa deıin taý kýrortyn keńeıtý, atap aıtqanda, aspaly joldar salý, shańǵy trassalarynyń uzyndyǵyn ulǵaıtý, eńisterdi, paraplandar, glampıng alańdaryn jabdyqtaý, meıramhanalar, kólder men etnoqalashyq salý josparlanyp otyr.
Jobany júzege asyrý barysynda Almaty oblysy ákiminiń orynbasary Rýstam Isataev negizgi úsh baǵyt boıynsha memlekettik qoldaý sharalary belgilengenin baıandady. Onyń aıtýynsha, oblys basshylyǵy ınjenerlik-kóliktik ınfraqurylymmen qamtamasyz etýge, sondaı-aq ákimshilik qoldaý kórsetýge daıyn.
«Qol qoıylǵan memorandým aıasynda ınjenerlik ınfraqurylymdy jaqsartý, 15 MVt qosymsha elektr qýatymen qamtamasyz etý, taý bókterinde jasandy qar jasaý úshin sýmen jabdyqtaý júıesin keńeıtý boıynsha mańyzdy jumystardy júrgizý josparlanyp jatyr. Jylyna 100 myń tekshe metrge deıin, sondaı-aq turmystyq qajettilik úshin táýligine 700 tekshe metrdi qamtamasyz etedi. Taǵy bir mańyzdy qadam – gaz qubyry ýchaskesiniń ótkizý qabiletin saǵatyna 1 000 tekshe metrge deıin arttyra otyryp, qaıta qurý kózdelgen. Sonymen qatar Baıbulaq aýylynan Oıqaraǵaıǵa deıin júk jáne jolaýshylar tasymaly jolyn salý jobasy júzege asyrylady. Asa mańyzdy qadam jaryqtandyrý ornatylyp, ótkizý qabiletin arttyra otyryp, Talǵar traktisi – Oıqaraǵaı jolyn qaıta jańǵyrtý jobasy iske asady», dedi R.Isataev.
Sóz sońynda oblys ákiminiń orynbasary óńirdegi týrızm salasyn damytýdyń birinshi kezektegi mańyzyna toqtaldy. Bul óńirdiń áleýetin eskere otyryp, týrızmdi damytý jalpy ilgerileýdiń negizgi faktoryna aınalatynyna senim bildirdi. Týrızmge quıylǵan ınvestısııa osy salanyń órkendeýimen qatar, óńirdiń jalpy ekonomıkalyq jáne áleýmettik damýyna da oń yqpal etetini týraly aıtty.
2023 jyldyń 11 aıyndaǵy jaǵdaı boıynsha týrızm sektoryndaǵy negizgi kapıtalǵa salynǵan ınvestısııa 51 mlrd teńgeni qurady, qosymsha 1 750 adamǵa jumys berilgen.
Almaty oblysy
