Almaty ákimdigi «Qazaq Stroy Almaty» kompanııasy turǵyn úı keshenin salý úshin aǵashtardyń bir bóligin kesýge qoldanystaǵy zańnamaǵa sáıkes ruqsat alǵanyn atap ótti. Alaıda aǵash kesý kezinde qurylys kompanııasy taǵy 170-ten astam aǵash pen 40 shaqty butany zańsyz otap, jalpy alǵanda 216 jasyl jelekti joıyp jibergen.
«Osyǵan baılanysty Ekologııa jáne qorshaǵan ortany qorǵaý basqarmasy mamandandyrylǵan tabıǵatty qorǵaý prokýratýrasy jáne tabıǵatty qorǵaý polısııasynyń qyzmetkerlerimen birlesip, keltirilgen zalaldy esepteıtin jasyl jelekterdi tekserý aktisin toltyrdy. Anyqtalǵan fakti boıynsha Almaty qalasy Alataý aýdanynyń polısııa basqarmasy Qylmystyq kodekstiń 340-baby boıynsha qylmystyq is qozǵady», dep habarlady ákimdik.
О́z kezeginde atalǵan qurylys kompanııasy 2023 jylǵy maýsymnan bastap «Memlekettik qyzmetter» portaly arqyly (Elicense.kz) Almaty qalasynyń ekologııa jáne qorshaǵan orta basqarmasyna turǵyn úı kesheni qurylysynyń aýmaǵyndaǵy aǵashtardy kesýge ruqsat alý úshin 6 ret ótinim bergenin aıtady. Degenmen barlyq ótinimge usynylǵan materıaldarda jasyl jelekter týraly aqparattyń mazmuny bar saraptama qorytyndysynyń bolmaýy sebebinen aǵashtardy kesýge ruqsat berilmegen.
Dese de qurylys júrgizýshi kompanııa ótken jyldyń jeltoqsan aıynda tıisti saraptama qorytyndysyn qaıta usynyp, mamandardyń oń sheshimin alǵan. «Aǵashtardy kesýge ruqsat berý memlekettik qyzmet bolyp tabylady. Sondyqtan qajetti qujattar usynylǵan jaǵdaıda aǵashtardy kesýge ruqsat berýden bas tartý múmkin emes», dep málimdedi Almaty ákimdigi.
Ekologııa jáne qorshaǵan ortany qorǵaý basqarmasy kesýge ruqsat berilgen 2 797 aǵashtyń ótemi retinde 27 970 jasyl jelek otyrǵyzylatynyn aıtty. Basqarma sonymen qatar 100 dana kólemindegi jasyl jelekti basqa jerge otyrǵyzý jónindegi jumystarǵa kelisim bergen. Basqarmadaǵylar bul jumystardyń jasyl jelekterdi kútip ustaý jáne qorǵaý erejeleriniń barlyq talabyna saı júzege asatynyna sendirdi.
Al óz kezeginde Sanjar Boqaev bastaǵan qoǵam belsendileri Almaty ákimdigi atalǵan jaǵdaıǵa baılanysty áreketsizdik tanytyp, qurylys kompanııasynyń múddesi úshin jasyl jelekti joıýǵa jol berdi dep synǵa alyp otyr.
ALMATY
