Mekteptiń úshinshi kezeńine qatysýshylarmen kezdesken Senat spıkeri bul qoǵamdyq joba memlekettik qyzmette, bızneste, halyqaralyq uıymdarda jáne basqa da salalarda jumys isteıtin jas mamandardyń analıtıkalyq qabiletin jetildirýdi kózdeıtinin atap ótti. Jańa kezeńdegi oqytý baǵdarlamasy Qazaqstannyń ornyqty damýy taqyrybyna arnalyp otyr.
«Prezıdent Qasym-Jomart Toqaev óz isine sheber kásibı mamandardyń jańa shoǵyryn qalyptastyrýǵa únemi basa mán berip keledi. Osyǵan oraı biz «Taldaý mektebi» jobasy arqyly atalǵan strategııalyq mindetti iske asyrýǵa óz úlesimizdi qosýdy uıǵardyq. Qazirgi tańda elimizde analıtıkalyq qabileti joǵary, bilikti mamandar daıarlaıtyn arnaıy júıe joq. Kóbine bul jumys júıesiz júrgizilip, tıisti deńgeıde tıimdiligin kórsete almaı keledi. Sondyqtan biz kásibı sarapshylardy shaqyryp, olarǵa jas áriptesterimen óz tájirıbelerin bólisýine múmkindik beretin alań qurdyq», dedi Máýlen Áshimbaev.
Jalpy, úshinshi kezeńge qatysýǵa nıet bildirgen 400-den astam ótinim kelip tústi. Konkýrstyq komıssııa ótinimderdi qaraý nátıjesinde 60 adamdy iriktep aldy. Olar – analıtıkalyq qurylymdarda, memlekettik basqarý júıesinde, ulttyq kompanııalarda, ǵylymı-zertteý ınstıtýttarynda jáne basqa da salalarda tájirıbesi bar, sondaı-aq keıbiri PhD dárejesine ıe mamandar.
Senat tóraǵasynyń dárisi «Memlekettik basqarýdaǵy ornyqty damýdy kózdeıtin analıtıka» taqyrybyna arnaldy. Spıker óz sózinde búginde memlekettik, dinı, saıası sııaqty túrli ınstıtýttardyń yqpaly men bedeliniń tómendeý úrdisine nazar aýdardy. Máýlen Áshimbaev onyń ornyna búkil álemde popýlıstik qozǵalystardyń yqpaly artyp, olar kóbine kún tártibin qalyptastyratyn negizgi faktorlarǵa aınalǵanyn da atap ótti. Osyndaı jaǵdaıda, eń aldymen, memlekettik deńgeıde durys sheshim qabyldaý úshin analıtıkalyq zertteýlerdiń mańyzy zor ekeni anyq.
«Qazirgi ekonomıkalyq jáne saıası úderisterdiń jalpy qaı baǵytta órbip jatqanyn, onyń astaryn túsiný asa mańyzdy. Álemniń jarqyn bolashaǵy kóbine halyqaralyq qaýipsizdik jáne jahandyq máselelerdi ujymdasyp sheshýdiń jańa salıqaly júıesin qalyptastyrýmen baılanysty. Osylaısha, biz belgisizdik beleń alǵan, aıqyn baǵdary joq, aldaǵy oqıǵalar men olardyń saldary qubylmaly álemde ómir súrip jatyrmyz. Bári tez ózgeretin mundaı álemde eski tásilder men úlgiler boıynsha áreket etýdiń keleshegi joq jáne ol múmkin de emes. Sondyqtan qazir analıtıkalyq daǵdylar, synı oılaý, bolyp jatqan oqıǵalarǵa júıeli jáne baısaldy kózqarasy bar mamandar suranysqa ıe», degen Máýlen Áshimbaev zertteýler júrgizý, taldaý qabiletin jetildirý boıynsha óz tájirıbesindegi keıstermen bólisti.
Sonymen qatar Palata tóraǵasy komandamen tıimdi jáne úılesimdi jumystyń mańyzdylyǵyn atap ótti. Sondyqtan qatysýshylar Ornyqty damý maqsattary boıynsha birlesken jobalar daıyndaý úshin toptarǵa bólindi. Olardyń árqaısysyna salalyq sarapshylar, memlekettik qurylymdardyń, ǵylymı jáne halyqaralyq uıymdardyń ókilderi mentor retinde bekitildi.
Oqýdyń alǵashqy kúni «Kýrsıv» basylymynyń jáne «Qalam» mýltımedııalyq jobasynyń bas dırektory Elmar Mýrtazaev pen «Eurasian Center for People Management» bas dırektory, daǵdarys jáne strategııalyq kommýnıkasııalar máseleleri jónindegi sarapshy Erbol Ismaılov dáris oqydy.
Aldaǵy segiz aptalyq oqý barysynda MMÝ professory Natalıa Zýbarevıchtiń, Lı Kýan Iý memlekettik saıasat mektebiniń professory Iаakob Ibragımniń jáne «Pıshı, sokrashaı» kitabynyń avtory Maksım Ilıahovtyń dáristeri de josparlanǵan.
Sondaı-aq tarıhshy, belgili saıasattanýshy jáne shyǵystanýshy Sultan Ákimbekov, Qazaqstan Prezıdentiniń ishki saıasat máseleleri jáne kommýnıkasııalar jónindegi kómekshisi Rýslan Jeldibaı, Strategııalyq josparlaý jáne reformalar agenttiginiń tóraǵasy Jandos Shaımardanov taǵy basqa spıkerler dáris oqıdy.
