Foto: gov.kz
2024 jylǵy 1 qantardaǵy jaǵdaı boıynsha eńbekke qabiletti jastaǵy etnıkalyq qonys aýdarýshylar sany 60,2%-dy, eńbekke qabiletti jastan kishi 30,9%-dy jáne zeınetkerler 8,9%-dy quraıdy. Eńbekke qabiletti jastaǵy qandastardyń ishinen bilim deńgeıi boıynsha 15,3%-y joǵary bilimdi, 32,4%-y orta kásibı bilimdi, 44,3%-y jalpy orta bilimdi, jáne 8,3%-ynyń bilimi joq.
Qonys aýdarǵan etnıkalyq qazaqtar túrli óńirlerge qonystanǵan. Sonymen qosa, qandastardy qonystandyrý úshin eńbek kúshi tapshy óńirler qatarynda Aqmola, Abaı, Qostanaı, Pavlodar, Shyǵys Qazaqstan, Soltústik Qazaqstan oblystary anyqtaldy.
2024 jylǵy 1 qańtardaǵy kórsetkish boıynsha qonystandyrý óńirlerine 2 337 qandas kóshirilgen, atalǵan sıfr 2023 jylǵa bekitilgen kvotaǵa sáıkesedi. Atalǵan óńirlerde qonystanǵan qandastarǵa kóshý úshin bir mezgilde otaǵasyna jáne otbasynyń árbir múshesine 70 AEK (2023 jyly – 241,5 myń teńge) mólsherinde; turǵyn úı jaldaýǵa jáne kommýnaldyq qyzmetterge aqy tóleýge – bir jyl ishinde 15-ten 30 AEK (2023 jyly – 51,7-den 103,5 myń teńgege deıin) mólsherinde sýbsıdııa túrinde memlekettik qoldaý sharalary usynylady.
Byltyr 2126 qandasqa túrli qoldaý sharalary kórsetilgen. Naqty ataǵanda, 735 adam turaqty jumysqa ornalastyrylyp, 2126 adam birjolǵy sýbsıdııa alǵan, al 694 qandasqa turǵyn úı shyǵyndary sýbsıdııalanǵan.
Sonymen qatar erikti qonys aýdarýdyń tıimdiligin arttyrý maqsatynda azamattardy soltústik óńirlerge qonys aýdarýǵa qatysatyn jumys berýshilerdi qoldaý boıynsha ınstıtýsıonaldyq sharalar qabyldandy. Turǵyn úı satyp alý, salý úshin nemese ıpotekalyq turǵyn úı qaryzdary boıynsha bastapqy jarnanyń bir bóligin jabý úshin ekonomıkalyq utqyrlyq sertıfıkaty turǵyn úı qunynyń 50%-y nemese bir otbasyna 4 mln teńgege deıin mólsherinde birjolǵy óteýsiz jáne qaıtarymsyz negizde engizildi.
Esterińizge salaıyq, ótken jyly pılottyq rejımde Qazaqstan elshilikteri arqyly «bir tereze» qaǵıdaty boıynsha qandas mártebesin berý tetigi júzege asyrylǵan. Pılottyq joba sheńberinde elimizge barý, jumys orny, turǵyn úı berý múmkindikteri týraly máseleni sheshýge jáne respýblıka aýmaǵyna kirmeı-aq qandas mártebesin alýǵa bolady. Qazirgi ýaqytta etnıkalyq qazaqtardan jańa formatta 6 203 ótinish qabyldandy.
