Ońaltý jobasy

Eńbek jáne halyqty áleýmettik qorǵaý mınıstrligi, Áleýmettik qorǵaý salasyn damy­týdyń ulttyq ǵylymı ortalyǵy jáne «Qazaqstan halqyna» qoǵamdyq qory eli­mizdiń 4 óńirinde «Úı jaǵdaıynda múge­dek­tigi bar balalardy QH ońaltý» jobasyn iske qosý týraly memorandýmǵa qol qoıdy.

Bul joba júıke júıesiniń aýrýlary men tirek-qımyl apparatynyń buzylýlary bar balalar sanynyń dınamıkalyq ósýi tur­ǵysynan ózekti bolyp otyr. Joba múge­dek­tigi bar balalardyń ómir súrý sapasyn jaq­sar­týǵa, sondaı-aq olardyń ońaltý áleýe­tin arttyrýǵa baǵyttalǵan.

«Qanatqaqty joba ázirge Abaı, Qyzyl­orda, Pavlodar oblystary men Shymkent qalasy qatarly 4 óńirdi qamtıdy. Ony jer­gilikti Áleýmettik qorǵaý salasyn damy­­tý­dyń ulttyq ǵylymı ortalyǵynyń fılıal­dary júrgizedi. Jobanyń 1-kezeńi sheńberinde 4 fılıalda ońaltýdyń tehnıka­lyq quralda­ryn (OTQ) irikteý úshin bólim­sheler ashyldy. Onda quraldardy paıdalaný, sondaı-aq múgedektigi bar balalar men olardyń zańdy ókilderi úshin qaýipsizdik tehnıkasy boıynsha oqytý júrgiziledi», delingen Eńbek jáne halyqty áleýmettik qorǵaý mınıstrliginiń habarlamasynda.

Ekinshi kezeńde fılıaldardyń kópsalaly komandalary múgedektigi bar balalardyń fýnksıonaldyq jaı-kúıi baqylaıdy, sondaı-aq medısınalyq-áleýmettik kórse­tilimder men qarsy kórsetilimder negizinde ońaltýdyń tehnıkalyq quraldaryn usyna­dy. Oqytýdan keıin usynylǵan OTQ ár balanyń jaǵdaıyna baılanysty belgilen­gen kýrs kezeńinde úıde ońaltý júrgizý úshin balalarǵa óteýsiz jalǵa beriledi. Jobany iske asyrý múgedektigi bar balalardyń qoǵam ómirine erkin aralasýyna múmkindik beredi jáne olarǵa kedergisiz orta qalyptastyrady.