О́ńir basshysy Narıman Tóreǵalıev 2024 jylǵy sý tasqyny kezeńine daıyndyq jóninde keńeıtilgen jıyn ótkizip, tıisti mekeme basshylarynyń baıandamasyn tyńdady. О́ıtkeni bıylǵy aýa raıynyń qubylmalylyǵy, ylǵaldyń moldyǵy kóktemgi sý tasqynynyń aldyn alýǵa erterek daıyndalý qajettigin kórsetip otyr.
Batys Qazaqstan oblystyq Tótenshe jaǵdaılar departamenti bastyǵynyń orynbasary Rashıd Bilálovtyń aıtýynsha, kóktemgi sý tasqyny kezeńine daıyndyq sheńberinde birqatar is-shara atqarylǵan eken.
«Keshendi josparymyz boıynsha 700 mln teńge qarjy jumsap, 133 is-shara oryndadyq. Ákimdikter 210 mln teńgege 100-den asa jabdyq pen arnaıy tehnıka satyp aldy. Qazirdiń ózinde 19 ýaqytsha gıdrobeket ornatyldy, 41 km-den astam qorǵanys bógeti salyndy jáne nyǵaıtyldy. 21 km-den astam aryq, avtojoldarda 49 sý ótkizý qubyry men 37 betondyq qurylys ornatyldy», deıdi Rashıd Beketuly.
Buǵan qosa óńirde 1 tıegish traktor, 67 500 qapshyq, 68 motosorǵy, 22 motorly qaıyq, 12 muz kesý qurylǵysy men 13 motoburǵy, 5 elektrogenerator, órt sóndirý jeńderi, qutqarý keýdesheleri, qysqy kıim men dron satyp alynǵan.
Aldaǵy ýaqytta Bórli aýdany boıynsha Keńtúbek, Aqsaı qalasy, Eski Araltal, Jańa Araltal aýmaqtary, О́spen, Jańatalap, Baqtyaral aýyldarynda qorǵanys bógetterin ornatý, Aqbulaq aýylyndaǵy bógetti qalpyna keltirý qajet. Dostyq aýylyndaǵy bógetti kúrdeli jóndeý, 1 motosorǵy, 1 qaıyq satyp alý kún tártibinde tur.
Al Báıterek aýdanynda Permetnoe aýylyndaǵy bógettiń qurylysy, Chırovo sý qoımasyn jóndeý jáne Razdolnoe aýylyndaǵy sý qoımasynyń shlıýzyn jóndeý josparlanǵan.
Shyńǵyrlaý aýdanynda da «Qyzylkól-Ardaq-Aqtaý» jolynyń 17 jáne 31 shaqyrymynda, sondaı-aq «Shyńǵyrlaý-Aqshat-Segizsaı» avtojolynyń 70 jáne 73 shaqyrymynda sý ótkizý qubyrlaryn ornatý, 1 motosorǵy, 1 qaıyq satyp alý kerek.
Terekti aýdanynyń Podstepnoe aýylynda, Bolashaq jáne Keremet shaǵyn aýdandarynda sý burý arnasynyń qurylysyna joba qujatyn jasaqtaý, 6 motosorǵy satyp alý da kózdelip otyr eken.
Tabıǵı resýrstar jáne tabıǵat paıdalanýdy retteý basqarmasy óńirdegi gıdrotehnıkalyq qondyrǵylardy jan-jaqty zerttep tekserip, Qaraoba, Solıanka, Chırovo sý qoımalarynyń joba qujatyn túzetýge tıis. Muratsaı sý qoımasyn jóndeý de – kezek kúttirmeıtin is.
Jolaýshylar kóligi jáne avtomobıl joldary basqarmasy «Bórli-Aqsaı-Jympıty» avtojolynyń 80 shaqyrymynda, «Chapaev-Jańaqala-Saıhyn» jolynyń 157, 227, 238, 244, 255, 265 shaqyrymdarynda, «Jańaqala-Uıaly-Bısen» jolynyń 192 shaqyrymynda jol astynan sý ótkizý qubyrlaryn ornatýy qajet. Qaztalov aýdanyndaǵy Ájbaı aýylynda qorǵanys bógetin ornatý, Aqjaıyq aýdany boıynsha Alǵabas aýylyndaǵy Kırov kanaly arqyly ótetin joldy nyǵaıtý, Oral qalasynyń Shuǵyla-Qambar batyr kóshesine aryq júıesin ornatý da óz kezegin kútip tur.
«Qazavtojol» mekemesi «Podstepnoe-Terekti-RF shekarasy» avtojolynyń 11 jáne 13 shaqyrymy tusynda, sondaı-aq Qaratóbe aýdanyndaǵy Qorjyn aýylyna kireberis joldyń 4, 5, 11 shaqyrymynda sý ótkizý qabiletin joǵarylatýy qajet.
Tótenshelikter oblys aýmaǵyndaǵy avtojoldarda sý basý qaýpi joǵary 49 oryn bar ekenin aıtady. Munyń 46-sy – avtokólik joly, úsheýi – temirjol.
Yqtımal tótenshe jaǵdaıdy joıýǵa qazir 4 myńnan astam adam, 1 myńnan astam tehnıka, 88 júzý quraly men 329 motopompa daıyndyqqa keltirilgen. Sondaı-aq 23 myń tonna ınertti materıal, 145 myń qap, 557 tonna janar-jaǵarmaı qory daıyndalypty.
«2,5 mln teńgege ǵaryshtyq monıtorıng jáne 80 mln teńgege aerovızýaldy zertteý júrgizýge kelisimshart jasaqtaldy», deıdi R.Bilálov.
Keıingi jyldaǵy sý tasqyny saldaryn eskere otyryp, Batys Qazaqstan oblysynda tasqyn qaýpi eń joǵary aýmaqtar – Oral qalasy, Báıterek, Tasqala, Bórli, Qaztalov jáne Qaratóbe aýdandary bolyp bekitildi.
Ortasha qaýip – Terekti, Shyńǵyrlaý, Syrym, Aqjaıyq jáne Jánibek aýdandaryna tıesili.
Jańaqala jáne Bókeı ordasy aýdandarynda sý tasqyny qaýpi joq deýge de bolady.
Jıyn barysynda aýa raıy boljamy, sý qoımalaryn tıimdi paıdalaný jóninde baıandamalar jasaldy. Bórli, Qaztalov aýdandarynyń ákimderi men Oral qalasy ákiminiń orynbasary kóktemgi sý tasqynynyń aldyn alý baǵytynda atqarǵan jumystary boıynsha esep berdi.
Oblys ákimi Narıman Tóreǵalıev orynbasarlaryna arnaıy komıssııa quryp, sý tasqyny bolýy múmkin mekenderdi aralap, sý qoımalaryn, qubyrlaryn tekserýdi tapsyrdy. Sonymen qatar óńir basshysy qańtar-aqpan aılaryn tıimdi paıdalanyp, qar tazalaý, qubyrlardy tazartý boıynsha jumys júrgizýdi júktedi.
Batys Qazaqstan oblysy
