Foto:gov.kz
Májilistiń jalpy otyrysynan keıin jýrnalıster qoǵamda qyzý talqylanyp jatqan marqumdardyń aǵzasyn jaqyndarynyń ruqsatynsyz alý taqyrybyna qatysty Densaýlyq saqtaý mınıstriniń pikirin surady.
Ajar Ǵınııat óz kezeginde «О́limnen keıingi aǵza donorlyǵyna kelisesiz be?» degen suraqqa «kelisemin» dep jaýap berdi.
Ol bul keshendi másele ekenin aıtyp, ózi basqaratyn mınıstrlik atalǵan máselede aýqymdy túsindirý jumystaryn júrgizip jatqanyn málimdedi.
«Adam ómirin saqtaý úshin keıbir qaıtys bolǵan adamdar nemese olardyń týystary organdaryn qıyn jaǵdaıda júrgen, sozylmaly aýrýlary bar, júregin, búıregin almastyrýdy qajet etetin adamdarǵa bere alady. Zań júzinde oǵan qajetti barlyq normalar bar. Sonymen qatar mınıstrlik janyndaǵy mekemede jasalǵan elektrondy regıstr bar. Bizdiń árbir kámeletke tolǵan azamat sol regıstrde óz aǵza múshelerin qaıtys bolǵannan keıin basqa muqtaj adamǵa berý máselesi boıynsha paıymyn jazyp kete alady. Búgingi tańda 40 myńnan astam el azamaty osy regıstrde oıyn bildiripti. Sonyń 15 paıyzy qaıtys bolǵannan keıin óz aǵzasyn basqa azamattardyń ómirin saqtaý úshin berýge kelisetinin aıtqan. Bul másele qoǵamnyń keshendi talqylaýy arqyly rettelý kerek. Mınıstrlik bul baǵytta aýqymdy túsindirý jumystaryn júrgizip jatyr», dedi Densaýlyq saqtaý mınıstri.
Eske salaıyq, «Qazaqstan halqyna» qorynyń basshysy marqumdardyń aǵzasyn ruqsatsyz alýdy usynǵan bolatyn.
Biz osy usynystyń sharıǵat shyńberinde qanshalyqty oryndy ekenin múftııattan surap bildik.
