Meńdiqara aýdanynda adasyp ketken malshy janyna ergen ıtiniń arqasynda aman qalyp otyr. Qańtardyń 14-inde mal izdep shyqqan tabynshy ushty-kúıli joǵalyp ketken. 15 qańtarda volonterlerdiń biri joǵalǵan malshynyń atyn bos júrgen jerinen taýyp alady. Astyndaǵy atynan aýyp túsip qalǵan malshy kúndiz jaıaý júrip jol izdep, túnde saı jerdi yqtap, ıtin qushaqtap jylynyp jan saqtaǵan. Qarly borannyń astynda dalany jaıaý kezgen malshy úshinshi kúni ózin izdep júrgen qutqarýshylar kóliginiń jaryǵyn da kórgen. Alaıda kózime elestegen shyǵar dep oılap, ol jaqqa umtyla qoımaǵan. Tańerteń sol kóliktiń izine túsedi. Abyroı bolǵanda, K-700 traktorynyń izi bos turǵan ańshylar úıine ákelgen. Tatar dámi taýsylmaǵan malshy sol jerde borannyń basylýyn kútip, kún tynshyǵan soń, ıtine erip aman-esen aýylǵa oraldy.
Borandy kúni jylqy izdep shyqqan Arqalyq qalasynyń mańyndaǵy Fýrmanov aýylynyń turǵyny da úsh kúnnen keıin tabyldy. Bes balanyń ákesi Talǵat Kenjındi ýchaskelik polıseı Vostochnoe aýylynan 5 shaqyrym jerden taýyp alǵan. Qazir aýyr jaǵdaıda Arqalyq aýrýhanasynyń jansaqtaý bóliminde jatyr. Beti men qol-aıaǵyn II-III dárejede úsik shalǵan.
Talǵat ta 14 qańtarda jylqy izdep shyqqan. 15 qańtarda malshynyń mingen aty men bir úıir jylqy tabyldy. Biraq ózi joq. Malshyny TJD qyzmetkerleri, jergilikti sharýa qojalyqtarynyń jumysshylary men volonterler 3 kún izdedi. Tórtinshi kúni izdeý sharalaryna tikushaq qosyldy.
Qutqarýshylar 14 qańtarda boranda adasyp ketken Arqalyq qalasyna qarasty Mırnyı aýylynyń turǵynyn da qulap jatqan jerinen taýyp alyp, ajal aranynan arashalap qaldy. Beti-qolyn úsik shalǵan áıel qazir jansaqtaý bóliminde jatyr.
Oblystyq TJD-nyń málimetinshe, osy úsh kúnniń ishinde 56 jolaýshy, 6 bala qutqarylyp, qar qursaýynda qalǵan 72 adam qaýipsiz jerge evakýasııalanǵan.
QOSTANAI
