«Biz Italııanyń Ortalyq Azııadaǵy basty seriktesi bolǵanymyzdy maqtan tutamyz. Eki el arasyndaǵy ekonomıkalyq yntymaqtastyq qarqyndy damyp keledi jáne qarym-qatynastardy odan ári arttyrýǵa mol áleýet bar», dedi Q.Toqaev.
Qazaqstan Prezıdentiniń aıtýynsha, Italııa – Qazaqstannyń Eýropadaǵy negizgi saýda seriktesteriniń biri jáne el ekonomıkasyndaǵy eń iri ınvestorlar qatarynda.
Sondaı-aq BUU, EQYU, Eýropa Keńesi jáne EYDU aıasyndaǵy álemdik arenada ortaq maqsattarǵa qol jetkizý isindegi eki eldiń tabysty yqpaldastyǵyna arnaıy toqtaldy.
Qasym-Jomart Toqaev Qazaqstannyń jahandyq qaýipsizdik, óńirlik turaqtylyq, terrorızmge qarsy kúres, klımattyń ózgerýi sııaqty máselelerge qatysty yntymaqtastyqty odan ári nyǵaıtýǵa daıyn ekenin jetkizdi.
Aıta keterligi, qazirgi tańda Qazaqstanda 300-den astam ıtalııalyq kompanııa tabysty jumys istep jatyr. Olardyń qatarynda «ENI», «SDF Group», «PetroValves», «Maire Tecnimont», «IVECO», «Tenaris» jáne basqa da iri ınvestorlar bar.
Italııa – Eýropa Odaǵyna múshe memleketterdiń ishinde Qazaqstanǵa ınvestısııa quıǵan iri bes memlekettiń biri. Italııadan Qazaqstanǵa tartylǵan tikeleı sheteldik ınvestısııa 7,3 mıllıard dollardy qurady. О́tken jyly ınvestısııa kólemi 2,5 ese ósip, 300 mıllıon dollarǵa jetti.
Yntymaqtastyq sapary
Italııa Prezıdenti men Premer-mınıstri Rımde Qazaqstan Prezıdentimen kezdesip, memleketter arasyndaǵy strategııalyq yntymaqtastyqty keńeıtýge, ortaq múdde aıasynda jumys isteýge jáne mańyzdy shıkizattar saýdasyn arttyrýǵa kelisti. Bul – Italııanyń Azııadaǵy rólin arttyrýǵa talpynysynyń bir dáleli.
Rım men Astana jaqyndaı tústi. Beısenbi kúni Italııa Prezıdenti Serdjıo Mattarella men premer-mınıstr Djordja Melonı Qazaqstan Prezıdenti Qasym-Jomart Toqaevty «Máńgilik qalada» qarsy aldy. Bul – Qazaqstan Prezıdentiniń Italııaǵa jasaǵan alǵashqy resmı sapary. «Qazirgi jáne odan ári damytqymyz keletin úlken yntymaqtastyqtyń belgisi», dep atap ótti Mattarella.
«Biz halyqaralyq qatynastar turǵysynan bir tolqyndamyz. Italııa men Qazaqstandy kópjaqtylyq qaǵıdaty baılanystyrady. Bizdiń ekonomıkalyq qarym-qatynasymyz qarqyndy damyp keledi», dedi Mattarella.
«Sapar áriptestiktiń strategııalyq qundylyǵyn jáne qarym-qatynastardyń joǵary deńgeıin rastaıdy», delingen Premer-mınıstr keńsesiniń resmı habarlamasynda. Melonı men Toqaev birlesken deklarasııaǵa jáne birqatar túsinistik týraly memorandýmǵa qol qoıdy. Osylaısha, múddeli máselelerde baılanystardy ártaraptandyrýǵa jáne tereńdetýge nıetti ekenin bildirdi.
Tarıhtyń jańa paraǵy
Qazaqstan Prezıdenti Qasym-Jomart Toqaevtyń Rımge saparynyń birinshi kúni birlesken deklarasııaǵa, jeti úkimetaralyq kelisimge jáne ózara túsinistik týraly 16 kommersııalyq memorandýmǵa qol qoıyldy.
Q.Toqaev kezdesýde qarym-qatynastyń jańa taraýy ashylǵanyn málimdedi. Onyń aıtýynsha, Italııa – qazirdiń ózinde Qazaqstannyń álemdegi úshinshi iri saýda seriktesi. Táýelsizdik alǵan 1991 jyldan beri Ortalyq Azııadaǵy elge Apennın túbegi 10 mıllıard dollarǵa jýyq ınvestısııa salǵan.
Qazaqstan Prezıdentiniń sózine súıensek, áriptestik qarym-qatynasty joǵary deńgeıge shyǵarýdyń jáne yntymaqtastyqtyń jańa salalaryn zertteýdiń ýaqyty keldi. Atap aıtqanda, energetıka jáne sıfrlyq damý, kólik ınfraqurylymy, ónerkásip jáne aýyl sharýashylyǵy salalarynda múmkindik mol.
Q.Toqaev Qazaqstan óz aýmaǵynda dándi daqyldar óndirisi salasynda usynyp otyrǵan orasan zor áleýetti paıdalana otyryp, makaron ónimderin shyǵaratyn ıtalııalyq kompanııalarmen birlesken kásiporyndar qurǵysy keletinin jetkizdi. Ortalyq Azııa eli álemdegi un óndirý boıynsha onynshy orynda jáne azyq-túlik qaýipsizdiginiń jahandyq tapshylyǵyn azaıtýǵa kómektese alady. «Biz ıtalııalyq kompanııalardy osy sektordaǵy múmkindikterdi paıdalanýǵa shaqyramyz. Bizdiń bıdaı qazirdiń ózinde spagettı óndirýge paıdalanylady, biz eksportty ulǵaıtýǵa múmkindigimiz bar», dedi Q.Toqaev.
