Foto: facebook.com/TeachForQazaqstan
Barlyq kezeńnen ótkender baǵdarlama boıynsha óńirlerge jiberilip, 2 jyl boıy jalaqysyna qosymsha taǵy 300 myń teńge stıpendııa alady. Buǵan qosa olar kásibı turǵyda damýdyń jolyna túsip, pedagogıkalyq daıarlyqtan ótedi.
«Teach for Qazaqstan» baǵdarlamasy – bilim sapasyn arttyrýǵa baǵyttalǵan «Teach For All» jahandyq jelisiniń bir bóligi. Onyń negizin 2007 jyly AQSh-taǵy «Teach for America» úkimettik emes uıymynyń basshysy Vendı Kopp pen anglııalyq «Teach First» úkimettik emes uıymynyń basshysy Brett Ýıgdors qalaǵan. Búginde bul bastama álemniń 62 elinde sátti júzege asyp keledi. Al elimizde atalǵan baǵdarlama maman tapshy óńirlerge úzdik pedagogterdi tartý, sol arqyly barlyq balaǵa birdeı sapaly ári zamanaýı bilim alý múmkindikterin jasaý, bilim sapasyndaǵy teńsizdikti joıý maqsatynda byltyrdan bastap qolǵa alyndy.
«Teach for Qazaqstan» baǵdarlamasyna pedagogıkalyq baǵytta bilim alǵan, bakalavrıat/magıstratýra bitirgeni týraly dıplomy bar, biraq osy salada tájirıbesi joq mamandar jáne pedagogıkalyq emes baǵyttaǵy bolsa da bakalavr/magıstratýra deńgeıinde bilim alǵan adamdar nemese joǵary oqý ornynda pedagogıkalyq mamandyqtyń 4-kýrsynda oqyp júrgen stýdentter qatysa alady.
Baǵdarlamaǵa qatysýshylardy irikteý 4 kezeńnen turady. Qatysýǵa nıetti jandar eń aldymen teachforqazaqstan.org resmı saıtyna kirip, onlaın-saýalnama toltyrýy kerek. Saýalnama suraqtary qazaq jáne orys tilderinde berilgen. Munda ár qatysýshy ózi týraly jeke aqparat, mamandyq ataýyn, oqý úlgeriminiń ortasha balyn (GPA) kórsetedi, ne sebepti baǵdarlamaǵa qatysýǵa nıet bildirgeni týraly motıvasııalyq esse jazýy qajet. Ekinshi kezeńde asessorlarmen onlaın-suhbat bolady. Úshinshi oflaın kezdesý kezeńinde kásibı jáne pedagogıkalyq biligi anyqtalady. Sońǵy kezeńde qatysýshy mamandyǵyna qaraı pándik test tapsyrmalaryn oryndaıdy nemese ádiskerlermen suhbattasady. Bul kezeńde qatysýshynyń tek pándik bilimi tekseriledi. Barlyq kezeńnen ótken úmitkerler seriktes joǵary oqý oryndaryna qaıta daıarlaýǵa jiberiledi.
Baǵdarlamaǵa qatysýshylar aldaǵy oqý jylynan bastap jumys isteýge, qonys aýdarýǵa daıyn bolýǵa, Qazaqstan azamaty bolýy jáne muǵalimderge arnalǵan jazǵy ınstıtýt baǵdarlamasyn bitirýge mindetti. Bul jobaǵa qatysýǵa nıet bildirgender qazaq tili, orys tili, aǵylshyn tili, tarıh, geografııa, ınformatıka, matematıka, bıologııa, fızıka, hımııa pánderiniń birinen sabaq beredi. Sondyqtan osy pánderge sáıkes keletin mamandyqty bitirgen bolýy shart. Mysaly, qazaq tili páninen sabaq berýge nıetti adam qazaq tili fılologııasyn nemese lıngvıstıkany oqyǵan bolýǵa tıis.
«Teach for Qazaqstan» baǵdarlamasy qaıta daıarlaý jazǵy ınstıtýtynda tegin oqytyp, resmı túrde jumysqa ornalastyrady. Sonymen qatar eki jyldyq kelisimshart aıasynda mekteptiń jalaqysy men qosymsha 300 myń teńge stıpendııa taǵaıyndaıdy, koýchıngtik jáne ádistemelik qoldaý kórsetedi. Sondaı-aq qatysýshylar qundy tájirıbe jınaqtap, óńirlerdegi áleýmettik jobalardyń júzege asýyna atsalysa alady. «Teach for All» jahandyq jelisiniń, halyqaralyq netvorkıngtiń tolyqqandy múshesi bolady.
Qysqasy, baǵdarlamada baq synap kórýdi qalaıtyndar 5 aqpanǵa deıin ótinim bere alady. Al irikteýden ótken baǵdarlama qatysýshylary muǵalimder jetispeıtin shalǵaı óńirlerge, shaǵyn qalalar men aýyldarǵa attanady.
