Foto: committee_sport
Álemniń 5 qurlyǵyndaǵy 40-tan astam memlekette tól kúresimizden federasııalar ashylǵan. Búginge deıin 10 Álem chempıonaty, 12 Azııa chempıonaty, 6 Álem kýbogi jáne 5 Eýropa chempıonaty ótip, tól kúresimiz qarqyndy damyp jatyr. Budan bólek Iran men Brazılııada kadetter men jastar arasynda álem chempıonattary, Ońtústik Afrıkada 2 Afrıka birinshiligi, Brazılııada Ońtústik Amerıka chempıonaty uıymdastyryldy. Al Qazaq Kuresi Assosıasııasynyń Ázerbaıjanda uıymdastyrǵan bul jolǵy alaman jarysqa qatysýǵa nıet bildirgen elderdiń de sany az bolmady.
«Sarhadchi» sport kesheninde jalaýyn kótergen baıraqty jarysty alǵysózben ashqan UWW Kongresi bıýrosynyń múshesi, dástúrli kúres túrleri komıtetiniń prezıdenti Rodıka Marııa Iаkshı hanym Eýropa chempıonatynyń qazaq kúresin damytýdaǵy rólin atap ótip, jarys qatysýshylaryna sáttilik tiledi.
Saltanatty is-shara barysynda sóz alǵan Qazaq Kuresi Assosıasııasynyń bas dırektory Damır Bekbosynov atalmysh chempıonattyń mańyzy joǵary ekenin aıtty.
«Qazaq kúresi Eýrazııa qurlyǵyndaǵy barlyq dástúrli kúres túrleriniń sınteziniń nátıjesi bolyp tabylady. Tól kúresimiz – qazaq halqymen birtutas, ult tarıhynyń ajyramas bóligi. Kúrestiń bul túri árqashan óskeleń urpaqty tárbıeleýdiń mańyzdy quraldarynyń biri boldy jáne bolyp qala bermek. Kezekti Eýropa chempıonatynyń Ázerbaıjan elinde ótip jatqanyna qýanyshtymyz. Jarysty joǵary deńgeıde uıymdastyrýǵa atsalysqan jergilikti qazaq kúresi federasııasynyń basshylyǵy men ujymyna alǵysymdy bildiremin. Bul chempıonattyń álemdik arenada qazaq kúresiniń odan ári qanat jaıýyna tyń serpin beretinine senimdimin», dedi D.Ásenǵazyuly.
Damır Bekbosynov UWW ókilderi men jergilikti federasııanyń basshylyǵyna Qazaqstannan jetkizilgen arnaıy kádesyılardy, al Ázerbaıjan Ulttyq sport assosıasııasynyń prezıdenti Kazym Kýrbanovqa Qazaq Kuresi Assosıasııasynyń prezıdenti ári Týrızm jáne sport mınıstrligi Sport jáne dene shynyqtyrý komıtetiniń tóraǵasy Erbol Myrzabosynovtyń Alǵys hatyn tabystady.
2022 jyly Astana qalasynda úsh jas tobyn (eresekter, jastar, jasóspirimder) qamtyǵan tuńǵysh Álem chempıonaty ótken bolatyn. Sol birinshilikke 40-qa jýyq memlekettiń balýandary qatysyp, jarys kórigin qyzdyrǵan edi. Sol dúbirli dodada synalǵan birqatar balýandardyń búgingi Eýropa chempıonatynda erekshe daıyndyqpen kelgeni anyq baıqaldy. Osy básekelerdi basynan aıaǵyna deıin tamashalaǵan laýazymdy tulǵalar, qurmetti meımandar, bapkerler men sportshylar jáne qatardaǵy qarapaıym kórermender qart Kaspıı jaǵasyndaǵy chempıonattyń uıymdastyrylý deńgeıine joǵary baǵasyn bergeni sózsiz.
Endigi kezekte Eýropa chempıonatynyń qorytyndysyna keler bolsaq, tartysqa toly beldesýlerde top jarǵan balýandar qarjylaı syıaqymen marapattaldy.
Eýropa chempıonatynyń demeýshisi – Sport Qory cportty qoldaý qory.
