Tarqatyp aıtsaq, Uıǵyr aýdany boıynsha barlyǵy 11 nysanǵa zaqym kelgen. Onyń ishinde densaýlyq saqtaý salasynyń 1 nysany, bilim berý salasynyń 8 nysany jáne 2 mádenıet úıi bar. Eńbekshiqazaq aýdany boıynsha 14 nysan anyqtaldy: 7 bilim berý nysany, 1 densaýlyq saqtaý nysany, 6 mádenıet oshaǵy. Al Talǵar, Jambyl, Qarasaı aýdandarynyń bilim berý nysandarynda, Kegen, Ile aýdandarynyń densaýlyq saqtaý ǵımarattarynda, Raıymbek aýdanynyń 2 bilim berý nysanynyń jáne 1 mádenıet úıiniń qabyrǵalarynda syzat paıda bolǵan.
Jer silkinisiniń saldarynan Kegen aýdandyq aýrýhanasyna qarasty emdeý mekemeleriniń ǵımarattaryna aıtarlyqtaı zaqym kelgen. Aıtalyq, Kegen aýdandyq aýrýhanasynyń emhana bólimi ǵımaratynyń shyǵys jaq bóligindegi jertólege túsetin esiktiń tusy, LFK kabınetiniń esiginiń janyndaǵy qabyrǵa jáne kúndizgi stasıonar dáliziniń qabyrǵalaryna qalyńdyǵy 0,5-2 sm shamasynda joǵarydan tómen qaraı syzat túsken. Jalpy aýmaǵy 22 340 sharshy metrlik ekiqabatty ǵımarat 2014 jyly qyzyl kirpishten salynǵan. Munda 513 bólme bar. Sodan beri jóndeý jumystary júrgizilmegen.
Sondaı-aq Saty aýylyndaǵy 2010 jyly salynǵan dárigerlik ambýlatorııa ǵımaraty da birshama búlingen. Ondaǵy emdeý bólmeleriniń qabyrǵalaryna japsyrylǵan kafelder túsip, tóbe men qabyrǵa aralarynyń 0,5 sm shamasynda ajyraǵany anyqtalǵan. Al ótken jyly ǵana paıdalanýǵa berilgen A.Núsipbekov aýylyndaǵy Kishi Jalańash dárigerlik ambýlatorııasy men irgesi 1990 jyly qalanǵan Jalańash aýyldyq dárigerlik ambýlatorııasynyń ǵımarattarynda da osyndaı jaıttar oryn alǵan.
– Jer silkinisinen zaqymdanǵan tórt nysannyń ekeýi – jańa, ekeýi – eski ǵımarat. Ondaǵy syzat alǵan qabyrǵalar men túsken kafelder salǵan merdigerlerdiń kómegimen jaqyn arada qaıta qalpyna keltiriledi, – dedi Kegen aýdandyq aýrýhanasynyń dırektory Almas Tileýlıev.
Eldiń úreıin týdyrǵan jer silkinisinen óńirdegi 17 bilim oshaǵy búlingeni belgili boldy. Ásirese Eńbekshiqazaq aýdanyna qarasty Qaıypov aýylyndaǵy orta mekteptiń qabyrǵasy 10 sm shamasynda ajyrap, úlken jaryqtar paıda bolǵan. Eski deýge kelmeıtin nysan 2015 jyly qoldanysqa berilgen. Memlekettik baǵdarlamamen salynǵan mekemege Almaty oblystyq Tótenshe jaǵdaı basqarmasy men jergilikti ákimdik tekseris júrgizip, oryn alǵan jaǵdaıdy anyqtady.
Jer silkinisi saldarynan paıda bolǵan bilim oshaqtaryndaǵy aqaýlar týraly bilmekke oblystyq bilim basqarmasynyń baspasóz qyzmetine habarlasqan edik. Alaıda mardymdy jaýap ala almadyq.
Al jer silkinisinen soń anyqtalǵan mádenıet nysandarynyń jaı-kúıine keler bolsaq, Raıymbek aýdanyndaǵy Tekes, Qaınar, Sarybastaý, Súmbe aýyldyq mádenıet úıleriniń qabyrǵalary jarylyp, aıtarlyqtaı zardap shekken. Sondaı-aq irgetasy 1965 jyly qalanyp, 2013 jyly kúrdeli jóndeýden ótken Jambyl aýdandyq mádenıet úıi men 2007 jyly paıdalanýǵa berilgen Aqqaınar aýyldyq mádenıet úıine zaqym kelgen. Jer silkinisi Uıǵyr aýdanyndaǵy eki aýyldyń jáne Eńbekshiqazaq aýdanyndaǵy 4 aýyldyń mádenıet oshaqtaryna ájeptáýir zalalyn tıgizgen.
Osyǵan oraı Almaty oblysy tótenshe jaǵdaılardyń aldyn alý jáne olardy joıý jónindegi komıssııanyń jospardan tys otyrysy ótti. Oǵan oblystyq komıssııa músheleri, aýdan jáne qala ákimderi, aýdandyq jáne qalalyq bólimderdiń, basqarmalardyń basshylary, oblystyq Tótenshe jaǵdaılar departamentiniń ókilderi qatysty.
– Atalǵan komıssııa otyrysy boıynsha oblystyq Tótenshe jaǵdaılar departamentine, basqarmalarǵa, aýdandar men qala ákimdikterine óz baǵyttary boıynsha naqty tapsyrmalar berilip, merzimderi bekitildi. Oblys boıynsha tótenshe jaǵdaılardyń aldyn alýǵa josparlanǵan is-sharalar baqylaýǵa alyndy. Ásirese jer silkinisi boıynsha seısmıkalyq oqý-jattyǵýlar úzdiksiz júrgiziledi, – dedi oblys ákiminiń orynbasary Nurjan Qudaıbergenov.
Apat aıtyp kelmeıdi. Osy jolǵy jer silkinisi adamdardyń tótenshe jaǵdaılarǵa daıyn júrýin, dabyl sómkesi bolýyn, eń bastysy, sabyr saqtaý qajettigin sanaǵa synalaǵandaı boldy.
Almaty oblysy
