Bul baıqaýdyń negizin 1992 jyly ataqty úndi mýzykanty, kompozıtor Lakshmınaraıana Sýbramanıam qalaǵan. Ol sodan beri festıvaldi kórnekti mýzykant, aǵartýshy, ákesi V.Lakshmınaraıannyń qurmetine ótkizip keledi.
Bıylǵy óner merekesi Úndistan men Qazaqstan arasyndaǵy mádenı baılanysty nyǵaıtýǵa arnaldy. Baıqaý Delı, Banglador, Maısor jáne Mýmbaı sekildi tórt qalada ótti, oǵan 80-ge jýyq ónerpaz qatysty. Onda belgili dırıjer, Qazaqstannyń eńbek sińirgen qaıratkeri Abzal Muhıtdınniń kórkemdik jetekshiligimen Erkeǵalı Rahmadıev atyndaǵy Memlekettik akademııalyq fılarmonııasynyń jáne Aqan seri atyndaǵy Soltústik Qazaqstan oblystyq fılarmonııasynyń sımfonııalyq orkestri, sondaı-aq bas dırıjer, Qazaqstannyń eńbek sińirgen qaıratkeri Gúlmıra Quttybadamovanyń kórkemdik jetekshiligimen elordalyq fılarmonııanyń Kameralyq hory óner kórsetti. Otandyq ónerpazdardyń ár konserti Kameralyq hordyń maǵynaly qoıylymdarymen bastalyp, úndi jurtshylyǵyna qazaq ániniń injý-marjany tartý etildi. Ásirese keń qulashty Aqan seriniń «Qaratorǵaı», kóńildiń názik qylyn shertetin Sáken Seıfýllınniń «Taý ishinde» jáne halyq áni «Qamajaıdy» oryndaǵanda tyńdarmandar qazaq ániniń ǵajaıyp sazdylyǵyna, syrshyldyǵyna tánti boldy.
Baıqaý baǵdarlamasy doktor Sýbramanıamnyń avtorlyq shyǵarmalaryna negizdelgen. Sondyqtan Nıý-Delıdegi Siri Fort konsert zalynda festıval shymyldyǵy metrdiń jańa týyndysy Bharat Symphony-men ashyldy. Sonymen qatar onyń Spring Rhapsody, Paris Concerto sııaqty shyǵarmalary da oryndaldy.
Kameralyq hordyń kórkemdik jetekshisi Gúlmıra Quttybadamova Úndi elindegi gastroldik sapardan jyly ásermen oralǵanyn jetkizdi.
«Biz onda san qyrly doktor Sýbramanıamnyń jańa mýzykasyn tyńdadyq. Onyń shyǵarmalary bir-birine múlde uqsamaıdy. Festıval keremet uıymdastyrylǵan. Bári kóńilimizden shyqty. Bizdi ár qalada kórermender qushaq jaıa qarsy alyp, konsert zaldary tolyp otyrdy. О́nerimizdi joǵary baǵalady. Qysqasy, bul óner sapary aýrasy bólek úndi mýzykasymen tájirbıe almasýǵa negiz boldy», dedi ol.
