Sybaılas jemqorlyqqa qarsy is-qımyl agenttigi Atyraý oblystyq departamentiniń basshysy Erulan Serikqalıevtiń aıtýynsha, Antıkordyń basty mindeti – bıýdjet qarajatyn jymqyrýǵa jol bermeý.
«Atyraý oblysynda jemqorlyq táýekeli kartasyna 8 nysan engizilip otyr. Birinshiden, kartaǵa Qyzylqoǵa jáne Mahambet aýdanyndaǵy mádenıet úıleri endi. Bul nysandardyń qurylysy toqtap qalǵan. Ekinshiden, Isataı men Maqat aýdanyndaǵy 60 páterlik, Inder aýdanyndaǵy 80 páterlik turǵyn úıler de engizilip otyr. Úshinshiden, Atyraý qalasyna taıaý ornalasqan Talǵaırań aýylyndaǵy 9 qabatty 90 páterlik 7 turǵyn úıdiń, káriz jáne sýmen jabdyqtaýdyń ınjenerlik jelilerin salý qurylysy da bar. Tórtinshiden, Isataı aýdanynyń Aqqystaý aýylyndaǵy órt sóndirý deposynyń qurylysyn da atalǵan kartaǵa engizýdi jón kórdik. Bıýdjet qarajatyn jymqyrýǵa jol bermeý úshin atalǵan nysandarǵa udaıy monıtorıng júrgiziledi. Monıtorıngtik topqa sybaılas jemqorlyqqa qarsy eriktiler de, jurtshylyq ta qosyldy», deıdi Erulan Serikqalıev.
Onyń aıtýynsha, Mahambet aýdanynyń Sarytoǵaı aýylyndaǵy mádenıet úıiniń qurylysy 2017 jyly bastalyp, oǵan 260 mln teńge bólingen. Mádenıet úıi 200 orynǵa eseptelgen. Alaıda nysan qurylysy merziminde aıaqtalmady.
«Merdigerge qatysty sot úderisi bastaldy. Atyraý oblysynyń mamandandyrylǵan aýdanaralyq ekonomıkalyq sotynyń sheshimimen merdiger «Stroı proekt-2017» JShS-men aradaǵy shart buzyldy. Qurylys kompanııasynan turaqsyzdyq aıyppuly óndirip alynyp, memlekettik satyp alýǵa josyqsyz qatysýshy dep tanyldy» dep málim etti E.Serikqalıev.
Qazir Sarytoǵaı aýylyndaǵy mádenıet úıiniń qurylysyn aıaqtaý úshin jańa merdiger «Grand Master» JShS-men shart jasaldy. Endi jańa merdiger qurylys-montaj jumystaryn qaıta bastaıdy.
Al Atyraý qalasynyń mańyndaǵy Talǵaırań eldi mekeninde 7 turǵyn úıdiń qurylysy da toqtap tur. Munda Turǵyn úı qurylysy bir jyl buryn toqtap qalǵan. Oǵan eki jaıt sebep bolǵan.
«Onyń birinshisi – merdigerdiń kelisimsharttaǵy mindettemelerin júıeli, ýaqtyly oryndamaýy; ekinshisi – qurylys materıaldarynyń qymbattaýy. Oblystyq qurylys basqarmasynyń mamandarymen, merdigermen jáne eriktilermen birge Talǵaırań eldi mekenindegi qurylysy bir jyl buryn toqtatylǵan 9 qabatty 90 páterlik jeti turǵyn úıdiń, sondaı-aq sý qubyry men káriz jelisiniń qurylys barysyna monıtorıng júrgizildi. Atyraý qalalyq ákimdiginiń qurylys bólimi turǵyn úılerdiń qurylysyn júrgizý úshin «Taraz Qurylys Invest» kompanııasymen 13,6 mlrd teńgege shart jasaǵan. Ár úı úshin 1,9 mlrd teńge bólingen. Osy kezge deıin 3,6 mlrd teńge ıgerildi», dep habarlady departamenttiń baspasóz qyzmeti.
Jergilikti departament basshysy Erulan Serikqalıevtiń pikirinshe, oblys ákimdigimen birge qurylysy uzaqqa sozylǵan nysandardyń máselesin oń sheshýge talpynys jasalyp otyr. Oblys ákimimen birge sybaılas jemqorlyq táýekeli kartasyna engizilgen nysandarǵa baılanysty anyqtalǵan buzýshylyqtardy joıý, qurylysyn jyl sońyna deıin aıaqtaý maqsatynda arnaıy jospar bekitilgen. Jaýapty memlekettik organdarǵa, qala men aýdandardyń ákimdikterine tapsyrmalar berilgen.
Atyraý oblysy
