Jıynda Qazaqstan Parıj klımattyq kelisiminiń qatysýshysy retinde neǵurlym ártaraptandyrylǵan jáne «jasyl» ekonomıka qalyptastyrýǵa arnalǵan qurylymdyq ózgeristerdi bastaǵany aıtyldy.
«Elimizdegi býlaný gazdary shyǵaryndysynyń tórtten úsh bóligin quraıtyn energetıkalyq júıeni tereń dekarbonızasııalaý Qazaqstandaǵy transformasııanyń negizi bolyp otyr. Energetıkalyq sektordy dekarbonızasııalaý bizge eki ese paıda ákelýi kerek: kómirtegi shyǵaryndysyn azaıtý men klımattyń ózgerý saldaryn jumsartý jáne taza otynǵa kóshý arqyly atmosferany lastaıtyn zattardyń shyǵaryndysyn azaıtý», dedi Olga Perepechına.
Senatorlar is-shara barysynda sýtegi energetıkasyn damytýǵa ınvestorlardy tartýǵa jaǵdaı jasaýdyń mańyzdylyǵyn atap ótti. Depýtattar jergilikti atqarýshy organdar barlyq qajetti ınfraqurylymdy eskere otyryp, jańartylatyn energııa kózderiniń jobalaryna arnalǵan yqtımal jer ýchaskesin aldyn ala belgileýi tıis dep sanaıdy.
Ekologııa jáne tabıǵı resýrstar mınıstriniń orynbasary Mansur Oshýrbaev «jasyl» tehnologııa salasyndaǵy jumys týraly baıandady. Ol Qazaqstanda birqatar zańnamalyq qujatty qabyldaý arqyly jasyl ekonomıkaǵa kóshý úshin uıymdyq-quqyqtyq negizder jasalǵanyn habarlady.
Kezdesýde sondaı-aq «Ekonomıkalyq zertteýler ınstıtýty» AQ, «Qazaq Green» jańartylatyn energııa kózderi qaýymdastyǵynyń, Jas ǵalymdar alıansynyń jáne Senat janyndaǵy Jas sarapshylar klýbynyń ókilderi baıandama jasady.
