Foto. aqmeshit-zhastary.kz
Qoljetimdi baǵadaǵy kókónistermen barynsha qamtý úshin óńirlerde jármeńkeler bastalady. Osy rette sáýir aıynyń ekinshi jartysynan bastap «QazTrade» saýda saıasatyn damytý ortalyǵy О́zbekstan men Tájikstannan ımporttaý jumysyn júrgizedi. Atap aıtqanda, Qazaqstannyń erte kókónisterge qajettiligin qamtamasyz etý úshin usynylǵan kólem: kartop – 8,2 myń tonna (sáýir-maýsym), pııaz – 5 myń tonna, (mamyr-maýsym).
Saýda jáne ıntegrasııa birinshi vıse-mınıstri Aıjan Bıjanovanyń aıtýynsha, ótken jyldardaǵy tájirıbeni eskerip, «QazTrade» kartop pen pııazdy ishki naryqqa jetkizý múmkindikterin pysyqtaǵan, jetkizý shemasy ázirlegen, onyń ishinde shekaralyq sharttarmen birge birqatar logıstıkalyq máseleler eskerilgen.
Keńeste sondaı-aq qanttyń eń tómengi kóterme baǵasyn belgileý múmkindigi talqylandy. Serik Jumanǵarın osy máselege qatysty túrli pikirlerdi eskerip, birlesken sheshim ázirleý úshin salalyq qaýymdastyqtar, aýyl sharýashylyǵy, ónerkásip mınıstrlikteri jáne basqa da múddeli tulǵalardyń qatysýymen keńes ótkizýdi tapsyrdy.
Sondaı-aq óńirlik komıssııalardyń qyzmeti týraly da baıandaldy. Jyl basynan beri óńirlerde 74 komıssııa otyrysy ótkizilip, shekti taýar baǵasynan asyp ketýdiń 67 faktisi anyqtalǵan. Olardyń basym bóligi Pavlodar, Túrkistan oblystarynda, Shymkent, Almaty jáne Astana qalalarynda tirkeldi.
Jalpy, jyl basynan beri áleýmettik azyq-túlik taýarlary baǵasynyń ósý dınamıkasy 0,2%-dy qurady. О́tken aptanyń qorytyndysy boıynsha baǵa ındeksiniń kórsetkishi turaqty.
