Máseleniń oń sheshimin tabý úshin byltyr 6 qarashada «Aýyl» partııasy men Halyqaralyq «Bolashaq» baǵdarlamalar ortalyǵy ózara yntymaqtastyq jaıynda memorandýmǵa qol qoıǵan bolatyn. Sonyń aıasynda partııa men ortalyq aýyldaǵy jas mamandardy «Bolashaq» baǵdarlamasymen sheteldiń oqý oryndarynda oqytý jáne taǵylymdamadan ótkizýde birlese jumys isteýge kelisken.
Al osy apta basynda «Aýyl» halyqtyq-demokratııalyq patrıottyq partııasynyń ókilderi atalǵan máselege baılanysty halyqaralyq baǵdarlamalar ortalyǵy basshylyǵymen kezdesý ótkizdi. Is-sharaǵa «Aýyl» partııasy ortalyq apparatynyń basshysy Q.Seıitjanov, Parlament Májilisindegi «Aýyl» partııasy fraksııasynyń depýtaty T.Serikov, Halyqaralyq baǵdarlamalar ortalyǵynyń basqarma tóraǵasy Á.Ospanova, sondaı-aq onlaın rejimde aýdandyq máslıhat depýtattary, aýdandar jáne aýyldyq okrýgterdiń ákimderi, «Aýyl» partııasy óńirlik fılıaldarynyń tóraǵalary men jastar jetekshileri qatysty.
Jıynda qos tarap shetelde «Bolashaq» baǵdarlamasymen bilim alýshy aýyl jastarynyń sanyn arttyrýdaǵy jumys jaıyn talqylady. Atap aıtsaq, eldi mekenderge nasıhattaý toptaryn jiberý, úmitkerlerdiń shet tilin talapqa saı meńgerýine jaǵdaı jasaý, jergilikti jerdegi agrarlyq mamandyq ıelerin, medısına qyzmetkerleri men muǵalimderdi kásibı taǵylymdamadan ótkizý máselesi keńinen sóz boldy.
– «Aýyl» partııasy tarapynan partııanyń fılıaldary arqyly aýyldyq jerdegi saýatty jastardy taýyp, olardyń shetelde bilimin shyńdaýǵa barynsha kómek kórsetemiz. Sonymen qatar Májilistegi depýtattar arqyly «Bolashaq» baǵdarlamasynyń keıbir kemshin tustaryn tolyqtyrýǵa, aýyl jastaryna qolaıly bolýy úshin zańǵa ózgerister engizýge kúsh salamyz, – deıdi partııa ortalyq apparatynyń basshysy Qýanysh Seıitjanov.
Sondaı-aq kezdesýde sóz alǵan Májilis depýtaty T.Serikov baǵdarlamada aýyldyqtar úshin tek magıstratýrada bilim alý qarastyrylǵanyn, taǵylymdama men doktorantýranyń umyt qalǵanyn eske saldy.
Jıyn sońynda kezdesýge qatysýshylar baǵdarlamaǵa qatysty suraqtar qoıyp, usynystaryn aıtty. Uıymdastyrýshylar árbir usynys pen suraq, kóterilgen máseleniń eskerýsiz qalmaıtynyn jetkizdi.
