Kitaptyń qoljazbasy 1972 jyly Baıanaýyl kentinde baspa mashınkasyna túsirilgen eken.
Bul kitaptyń jazylýyna akademık Qanysh Imantaıuly Sátbaev túrtki bolǵan. Qoljazba kúıinde QazKSR Jazýshylar odaǵynyń kórkemdik keńesine jiberilip, belgili sebeptermen keıin qaıtarylǵan. Povest araǵa jarty ǵasyrdan astam ýaqyt salyp oqyrmanǵa alǵash ret jol tartyp otyr.
Týyndy Pavlodar oblystyq Buqar jyraý atyndaǵy ádebıet jáne óner mýzeıiniń uıytqy bolýymen qazaq jáne orys tilderinde jaryq kórip otyr. Redaksııalyq alqa músheleri – Erbol Qaıyrov, Murat Aıaǵanov, Janbolat Abaıhan.
Qosym Pishenbaev HIH ǵasyrdyń sońy men HH ǵasyrdyń basynda qazaq jerindegi 20-dan astam ken ornyn alǵash ashqan qazaq. Ekibastuz sekildi alyp óndiristik aýmaqtyń negizin salyp bergen kentanýshynyń qaı eńbegi bolsyn ataýǵa turarlyq. Q.Pishenbaev izdep tapqan ken oryndary ishinde «Ekibastuz», «Aleksandrovka», «Berikqara», «Qazanaýyz», «Maıkóbe», «Maıqaıyń», «Josaly», «Kóktas», «Jeltaý», «Jartas», «Úshqatyn», «Naızatas», «Úshqara», «Qaraqura», «Shóptikól», «Altyndy» sııaqty nysandar bar.
Kitap Qosym Pishenbaevtyń ken barlaýshylyq ómiriniń mańyzdy kezeńderin sýretteıdi. Qosymnyń balalyq shaǵy, ata-anasynyń baı aýylynan kórgen qorlyǵy, alǵashqy tabylǵan ken oryndary men orys kópesteriniń qazaq jerindegi ónerkásipteri týraly, Ekibastuz kómiri men Maıqaıyń altyn kenishindegi alǵashqy ónerkásipter, taǵysyn-taǵy derekti maǵlumattar keńinen qamtylǵan. «Kedeıdiń qoly qysqa», «Qosymnyń balalyq shaǵy», «Alǵashqy olja», «Alǵashqy mahabbat», «Alǵashqy aqsha», «Alǵashqy saýda», «Qarsylas paıda boldy», «Taý bókterindegi zaýyt», «Qosym baıdan kek aldy», «Qosym óndiristik artel uıymdastyrdy», «Kútpegen qonaq», «Ekibastuz», «Maıqaıyń», «О́tken kúnder men búgingi zamannyń toǵysy» bólimderinen turady.
Povest Toraıǵyrov ýnıversıtetiniń jáne Baıanaýyldaǵy «Ánet» sharýa qojalyǵynyń demeýshiligimen, qazaq jáne orys tilderinde «Parasat» baspahanasynda basylyp shyqty.
Tusaýkeser is-sharasynda Q.Pishenbaevtyń atalas týysy Amantaı Esimbaev pen ólketanýshy A.Cherkashınnyń urpaǵy Galına Baıok estelikter aıtty. A.Cherkashın «Baıanaýl», «Doch Baıanaýla», «Qosymnyń taǵdyry» kitaptaryn jazǵan, Baıanaýyl óńiriniń arǵy-bergi tarıhy týraly mol maǵlumattar qaldyrǵan.
Is-sharada sondaı-aq Júsipbek Aımaýytovtyń 135, Sábıt Dónentaevtyń 130, Qanysh Sátbaevtyń 125, Álkeı Marǵulannyń 120, Sháken Aımanovtyń 110, Rústembek Omarovtyń 105, Múbárak Jamanbalınovtyń 100, Qımadıden Nyǵmanovtyń 100 jyldyq mereıtoılaryna arnalǵan kórme uıymdastyryldy.
Pavlodar oblysy
Ekibastuz qalasy
