Foto: akorda.kz
Prezıdent jańadan taǵaıyndalǵan Úkimet basshysyna elimizdegi áleýmettik-ekonomıkalyq salaǵa jańa serpin berý mindetin júktedi.
«Ekonomıkanyń barlyq salasyn damytý, yntalandyrý joldary men aldyn ala mindetterdi qaıta qaraý qajet. Túptep kelgende, memleket endi úzdiksiz qoldaý sharalarynan naǵyz sapaly damýǵa qolǵabys etý isine túbegeıli kóshý kerek. Bul jumysty sóz júzinde emes, is júzinde oryndaıtyn ýaqyt jetti. Osylaısha biz ozyq damý jolyna túsip, ulttyq ekonomıkany shyn máninde jańa deńgeıge shyǵaramyz. Qazir elimizdiń salyq jáne bıýdjet kodeksteri memlekettik satyp alý jáne memleket pen jeke menshik áriptestigi týraly zańnamalar múlde jańasha sıpatqa ıe boldy. Sonyń bári men jarııalaǵan jańa ekonomıkalyq saıasatty júzege asyrýdyń myqty tiregi bolýǵa tıis», dedi Q. Toqaev.
Qasym-Jomart Toqaev Úkimet memlekettiń damý jolynda mańyzdy sheshimderdi kóp sozbaı qabyldaý kerek ekenin eskertti.
«Sonymen qatar aldymyzda tarıf saıasatyndaǵy kedergilerdi joıý, agrosektordy qaıta jandandyrý áleýmettik salany basqarý men qarjylandyrýdyń tıimdi tásilderin ázirleý mindeti tur. Bul jerde, árıne, eń aldymen Úkimet mańyzdy ról atqarýy tıis. Jańa qarqynmen jumys isteý qajet. Mańyzdy sheshimderdi shuǵyl qabyldap, kóp sozbaı sheshýshi qadamdardy jasaý kerek», dedi Memleket basshysy.
