Foto: time.kz
– Saýalymyzdy qoǵamda dúmpý týdyrǵan, áli de talqylanyp jatqan 97 kg salmaqtyń fınaldyq beldesýine qatysty qoısaq. Kórdińiz, qalaı boldy? Eresekter arasynda erkin kúresten tuńǵysh álem chempıony Rızabek Aıtmuhannyń jańa salmaqqa aýysqannan keıingi alǵashqy dodasy ǵoı. Azııa chempıonatynyń tórt dúrkin júldegeri (2 kúmis, 2 qola) Álisher Erǵalı mol tájirıbeniń arqasynda asyp túskendeı kórindi.
– Árıne, Álisher Erǵalı 97 kg salmaqta ádben tóselip ysylǵan balýan. Rızabek byltyr tuńǵysh álem chempıony atanǵan soń syı-qurmetke keneldi, kóp qydyrdy. Munyń barlyǵy da jattyǵýǵa kesirin tıgizedi.
Foto: Nurǵalı Jumaǵazy
– Sózińizdiń jany bar, fınaldyq beldesýdiń alǵashqy kezeńinde belsendi bolyp tipti upaı basymdyǵymen alda turǵan Rızabek sońǵy mınýtta qos búıirin soǵyp silelep qaldy.
– Álisher – syralǵy balýan, oqý-jattyǵý jıynyn Daǵystanda ótkizip, ázirlik júrgizdi. Mine, tókken terdiń óteýine Qazaqstan chempıonatynyń altyn medali buıyrdy.
– Alda Bishkekte ótetin aımaqtyq irikteý týrnıri tur. Kimderdiń baratyny el birinshiligindegi kórsetkishke saı aıqyndala ma?
– Iá, Qazaqstan chempıonatynda júlde alǵan balýandar Olımpıada lısenzııasy úshin ótetin týrnırge qatysady. Qyrǵyzstanda ótetin aımaqtyq irikteýge chempıon atanǵan balýandardyń barýy zańdylyq. Odan keıin Ystanbuldaǵy álemdik irikteý dodasyna Bishkekte joldama buıyrmaǵan salmaq dárejesindegi balýandar qatysady.
– Bishkekke de, Ystanbulǵa da tek ishki birinshilikte chempıon atanǵan balýandar barýy tıis pe?
– Ondaı qatyp qalǵan qaǵıda joq. Úshtikke engen balýannyń qaı-qaısy da babyna enip dodaǵa túsýge saı bolsa, qatysady. Bishkekte joldama ala almaǵan balýandy Ystanbulǵa da súıreı bergen oryndy ma? О́zge sportshylardyń da áleýetin baǵamdaý kerek.
– Keler kúnniń enshisindegi jospar qandaı?
– Basty meje – Parıj Olımpıadasy. Soǵan tórt kózimiz túgel qatysyp, elge júldeli oralsaq degen úmit basym. Bahreın ulttyq quramasy birlesken jattyǵý jıynyn ótkizsek degen yqylas tanytty. Qyrǵyzstan balýandary da bizben birge daıyndyq ótkerýge qumbyl otyr. Balýandar az kún tynyqqan soń jattyǵýdy bastaımyz. Reseıge attanyp, sol eldiń sańlaqtarymen birlesken jattyǵý ótkizsek deımiz.
– El chempıonatyn tamashaladyńyz, qaı salmaqtaǵy balýandar tánti etti?
– Jastardyń qalyń shoǵyry ósip kele jatqanyn ańǵardyq. 18-19 jastaǵy balýandar tájirıbeli qarsylastarynan qaımyqpaı beldesti. 57kg salmaqta chempıon atanǵan Rahat Qaljannyń kúresý óneri o bastan tartymdy edi. Jigerli, qaımyqpaıdy, altyn medal alady dep ishteı senim arttyp edim, úmit aqtaldy. Sol sekildi 65 kg salmaqta jeńiske jetken mańǵystaýlyq Maııs Alıevtiń de áleýeti zor. Biraq bulardy iri dodaǵa qazir qossaq, jasytyp alýymyz múmkin, jastardan eresekter arasyna endi ótip otyr. 86 kıloda chempıon atanǵan Nurjan Isaǵalıevtiń de jattyǵýda janyn salyp eńbek etetini tánti etýshi edi, óteýine mine altyn medal buıyryp otyr.
– Basty meje Parıj jazǵy Olımpıadasy dedińiz ǵoı. «Toǵyz ulym bir tóbe, Er Tóstigim bir tóbe» degendeı, qurama balýandarynyń arasynda kimderden úmit kútesiz?
– Olımpıadanyń medalin oljalaıdy dep álem birinshiliginiń eki dúrkin júldegeri, Azııanyń eki márte chempıony Azamat Dáýletbekovke (86 kg) zor senim artyp otyrmyz. Qalǵan balýandar joldama alsa, olardyń arasynan jarqyrap shyǵatyn talanttar baryna shúbá keltirmeımin. «Aryq aıtyp, semiz shyqqan» jón qashanda, sondyqtan kúni buryn ton pishkendeı bolmaıyn. Jetistik tek eńbekke ǵana buıyrady, sondyqtan barymyzdy salýymyz kerek.
