Bárekeldi! 
Keshe Taraz qalasyndaǵy №1-shi perzenthanada oblys isker áıelderi qaýymdastyǵynyń qoǵamdyq birlestigi “Birligimiz jarasqan!” uranymen ótkizilip jatqan aksııa sheńberinde “Ashyq júrek” atty qaıyrymdylyq is-sharasyn uıymdastyrdy. Oblys ortalyǵyndaǵy bul perzenthanada elimizdiń kóptegen bolashaq batyrlary men aqyndary, ǵalymdary men daryndary dúnıege kelip jatyr deýge tolyq negiz bar.
О́ıtkeni, perzenthana bas dárigeri Q.Saǵynǵalıevanyń aıtýynsha, munda bir aıda 600-ge jýyq náresteniń kindigi kesiledi eken. Al ústimizdegi jyldyń ótken 5 aıy ishinde ińgálaǵan 3000 sábı dúnıe esigin ashypty. Atam qazaq “adamdy sanamaıdy” dep yrym etse de, “balaly úı bazar” degendeı, elimizdiń ósip-órkendep jatqan qýanyshyn júrek túkpirinde jasyryp tura almadyq. Sonymen... Perzenthana zalyna bosanǵandaryna nebary bir aptanyń kólemi bolǵan, búgin-erteń otbasyna sábıli bolyp oralýǵa daıyn otyrǵan 20 ana shaqyrylypty. Bári de órimdeı jas. Báriniń qolynda qundaqtaýly sábıler. Al “qyzyl shaqalardyń” ózderine arnalǵan sán-saltanatpen “sharýasy” joq, ár qaısysy óz minezderimen, óz únderimen perzenthanany “bastaryna kóterip” jatyr. Beıne bul da “Ashyq júrek” aksııasynyń “bas áni” syndy qulaqqqa oǵash estilmeıdi. Oblys ákimi janyndaǵy Áıelder isteri jáne otbasylyq demografııalyq saıasat jónindegi komıssııanyń hatshysy K.Toǵyzbaeva, oblys isker áıelderi qaýymdastyǵy qoǵamdyq birlestiginiń tóraıymy G.Nurymova analardy qýanyshtarymen quttyqtady. Shynynda, áıel mereıi – ómirge sábı ákelýimen asqaqtaı túsedi. Naǵyz baqyt degen de osy. Osyǵan oraı, búginde elimizdegi halyq sanynyń ósip-ónýine qal-qaderinshe úles qosyp otyrǵan analar úshin jasalyp jatqan qamqorlyq ta az emes. Sonyń arqasynda “Altyn alqa” men “Kúmis alqaǵa” jáne kóptegen áleýmettik jeńildikterge qol jetkizgen kóp balaly analardyń qatary da jyl sanap kóbeıe túsýde. Oblysta ótkizilip otyrǵan osy qaıyrymdylyq is-shara da sol qamqorlyqtardyń biri bolyp tabylady. Gúldar Nurymova alystaǵy Moıynqum aýdanynan kelgen jas ana Aısulý Ábdirahmanova dúnıege ákelgen Mıras atty ulǵa “naǵashy áje” atanyp, besik syılady. Aısulýdyń kúıeýi Mels Ábdirahmanov qarapaıym jumysshy. О́zi úı sharýasyndaǵy áıel. Sondyqtan jabdyqtary jalt-jult etken bul syılyq, shynynda oblysta buryn-sońdy qolǵa alynbaǵan jáne aldaǵy ýaqytta elimiz boıynsha ıgi dástúrge aınaldyrýǵa bolatyn jaqsy bastama eken dep túıdik. Sóıtip, saltanatqa shaqyrylǵan basqa analarǵa da barlyǵy 200 myń teńge kólemindegi baǵaly syılyqtar tabys etildi. Halqymyzda “Qýanysh bólisse kóbeıedi, qaıǵy bólisse azaıady” degen qanatty sóz bar. Elbasy da, el de ata-babalardyń osy ósıetine únemi adaldyq tanytyp keledi. Buǵan mysal retinde, Almaty oblysy men Shyǵys Qazaqstan oblysyndaǵy topan sý alǵan aýyldardyń ornynan boı kótergen jańa qonysty aıtýǵa bolady. Al perzenthanadan otbasyna oralǵaly otyrǵan otbasylardyń qýanyshyna ortaqtasyp, jaǵdaıy tómen jas otbasylarǵa “naǵashylyq” jolmen besik syılaý – tek qana jańa turpatty qazaqstandyqtardyń ǵana qolynan keletin is. Bedeldi, berekeli eldiń dástúri de bekzat! Elde “dos súıinip, dushpan kúıinetin” osyndaı jańa da, jaqsy bastamalar kóbeıe bersin dep tileıik, aǵaıyn! Kósemáli SÁTTIBAIULY. Jambyl oblysy.
