Osyǵan oraı Memleket basshysy Qazaqstan halqyna Joldaýynda azamattardyń qarjylyq saýatyn arttyrýdyń mańyzyn atap ótip, «Amanat» partııasyna Úkimetpen birlesip «Qaryzsyz qoǵam» jobasynyń aýqymyn keńeıtýdi tapsyrǵan edi.
Halyqtyń qarjylyq saýatyn arttyrýdy kózdeıtin joba jalǵasyp keledi. Bıyl 750 myń otandasymyz qarajatty utymdy basqaryp, shyǵyndy ońtaılandyrýdy úırenedi. Taıaýda kýrstan ótýge tilek bildirgen azamattardyń alǵashqy legin oqytý jumysy bastaldy. Aıta keteıik, byltyr jobaǵa 8 óńirdiń turǵyndary ǵana qatysa alsa, endi turǵylyqty jerine qaramastan barlyq nıet bildirýshi oqýǵa jazyla alady. Osy aptada 6 myń adam oqytý kýrsynan ótedi.
Partııanyń Atqarýshy hatshysy Dáýlet Káribektiń aıtýynsha, bıyl elimizdiń barlyq 20 óńirinde 200 myń adamdy oqytý josparlanyp otyr. Sondaı-aq mektep, kolledj jáne joǵary oqý ornyna arnalǵan ádistemelik quraldar ázirlenedi. Bul shamamen 100 myń stýdent pen 450 myń oqýshyny qarajatqa neǵurlym jaýapty qaraýǵa úıretýge múmkindik beredi.
«Bıyl qarjylyq saýatty mektep qabyrǵasynan bastap arttyrýdy qolǵa alamyz. Sondaı-aq elimizdiń barlyq 20 óńirinde partııamyzdyń fılıaldary janynan «Qaryzsyz qoǵam» jobalyq keńseleri ashylady. Onda kez kelgen adam qarjylyq jáne quqyqtyq máseleler boıynsha keńes ala alady. Búginde árbir ekinshi qatysýshynyń otbasyndaǵy ortaq tabysy 100 myń teńgege de jetpeıdi. Sonymen qatar kýrstan ótken azamattardyń úshten birinde eki nemese odan da kóp nesıe bar. Qatysýshylar arasynda balasynyń nesıesin tóleýge májbúr bolǵan zeınetkerler de kezdesti. Jobanyń negizgi maqsaty – adamdarǵa nesıe aýyrtpashylyǵyn jeńildetýge kómektesý. Jalpy, byltyr 65 myńnan astam otandasymyz qarjylyq saýatyn arttyrdy. Endi ony 750 myń adamǵa jetkizýdi kózdep otyrmyz», dedi ol.
«Qaryzsyz qoǵamǵa» qatysýshylardyń 58 paıyzy – tórt nemese odan da kóp bala tárbıelep otyrǵan kópbalaly otbasylar. Joba jetekshisi Aqmaral Bekmurzaevanyń aıtýynsha, adamdar kúndelikti qajetin óteý úshin nesıe rásimdeıdi.
«Adamdar nesıeni jaǵdaıy jaqsy bolǵannan almaıdy. Máselen, kómir satyp alý úshin nesıe rásimdegen adamdardy da kezdestirdik. Iаǵnı azamattar qarapaıym qajettiligin óteıdi. Alaıda nesıe otbasyndaǵy qarym-qatynasqa teris áser etedi. Tipti jobaǵa qatysýshylardyń biri qaryzǵa belshesinen batqandyqtan, aǵaıyn-týysy da odan syrt aınalǵanyn aıtty. Sondyqtan qarjylyq saýatty arttyrý – aýadaı qajet», dedi ol.
Sondaı-aq is-shara barysynda Qarjy naryǵyn retteý jáne damytý agenttigi tóraǵasynyń birinshi orynbasary Nurlan Ábdirahmanov, Oqý-aǵartý birinshi vıse-mınıstri Natalıa Jumadildaeva, Ǵylym jáne joǵary bilim vıse-mınıstri Talǵat Eshenqulov, Májilis depýtaty, «Amanat» fraksııasynyń múshesi Berik Beısenǵalıev, «Halyk Bank» basqarma tóraǵasynyń orynbasary Dáýren Sartaev jáne taǵy basqalar sóz sóıledi.
Eske sala keteıik, «Qaryzsyz qoǵam» jobasy byltyr 2 mamyrda qanatqaqty rejimde bastaý aldy. Sarapshylardyń dárisinen bólek, jobaǵa qatysýshylar enbek.kz portalyna tirkelý jáne JK ashýdan bastap, sottan tys bankrottyqty súıemeldeý jáne bereshekti óteý kestesin ázirleýge deıingi túrli suraqtar boıynsha keńes alady. Sondaı-aq oqytý barysynda qatysýshylarǵa zańger kómegine kepildik beriledi. Olar ár qaryz alýshynyń nesıe tarıhyn jeke zerttep, qaryz júktemesin jeńildetý boıynsha keńes beredi.
Kýrsqa jazylý úshin turǵylyqty jeri boıynsha partııanyń aýdandyq fılıalyna habarlasý qajet. Jobaǵa qatysýshylar kúndizgi formatta saýatyn arttyryp, bir topta 50 adamǵa deıin oqytylady. Dáristiń uzaqtyǵy – 5 jumys kúni.
