«Study UK Alumni Award jeńimpazdary men fınalısteri qoǵamǵa, ındýstrııaǵa, jalpy eldiń damýyna oń úlesterin qosý úshin Ulybrıtanııa ýnıversıtetinde alǵan bilimi men tájirıbesin tıimdi paıdalanǵan óz salasynyń kóshbasshylary. Bul bedeldi syıaqy Ulybrıtanııanyń joǵary biliminiń qundylyǵy men túlekterdiń mansaptyq jáne jeke damýlaryna yqpalyn baıqatady, sondaı-aq, brıtandyq túlekter men oqyǵan ýnıversıtetteriniń halyqaralyq bedelin arttyrady. Atalǵan syıaqyny Brıtan Keńesi toǵyz jyl qatarynan dúnıe júzindegi Ulybrıtanııanyń halyqaralyq túlekterine joǵary jetistikteri úshin tabystap keledi. Al, Qazaqstanda bul baıqaý bıyl tórtinshi ret uıymdastyrylyp otyr», dedi Brıtan Keńesiniń Kommýnıkasııa boıynsha keńesshisi Shynar Shákenova.
Bıyl atalǵan baıqaýǵa 43 úmitker qatysyp, 12 fınalıst tańdap alynǵan, onyń ishinde tórt sanat boıynsha tórt jeńimpaz anyqtaldy.
Aıta keteıik, «Culture and Creativity» nomınasııa boıynsha fınalıster arasynda «Egemen Qazaqstan» gazetiniń «Saıasat jáne Quqyq» bóliminiń aǵa tilshisi Gúlnar Joljan bar. Ol 2017 jyly Ulybrıtanııanyń Newcastle ýnıversıtetinde «Bolashaq» baǵdarlamasymen bilim aldy.
Al «Social Action» nomınasııasynyń jeńimpazy Halıda Ájiǵulova «Bolashaq» baǵdarlamasymen 2019 jyly Ulybrıtanııanyń Leicester ýnıversıtetiniń doktorantýrasynda bilim alyp, Zań doktory dárejesin ıelengen. Halıda – adam quqyqtary jónindegi zańger, Almaty qalasynyń Bala quqyqtary jónindegi ýákil jáne Shyǵys Eýropa men Ortalyq Azııadaǵy seksýaldyq qanaýshylyq pen zorlyq-zombylyqtyń aldyn alý boıynsha halyqaralyq keńesshi. Halıdanyń qoǵamdyq jumysy balalardy qorlaýǵa tyıym salatyn jáne barlyq Qazaqstan mektepterinde zorlyq-zombylyqqa qarsy ishki saıasatty júrgizýge mindetteıtin zańnamany qabyldaýǵa negiz boldy. Qazir ol Qazaqstandaǵy balalardyń ál-aýqaty men qorǵalýy týraly tıimdi zańdardy qabyldaý úshin zertteý jáne aqparattyq-nasıhattaý jumystaryn júrgizip júr.
«Qazaqstandaǵy Study UK Alumni Awards syılyǵynyń jeńimpazdaryn shyn júrekten quttyqtaımyn! Ulybrıtanııa ýnıversıtetterin támamdaǵan Qazaqstan túlekteri brıtan biliminiń ozyqtyǵyn kórsetip, eki el arasyndaǵy baılanysty burynǵydan da nyǵaıtyp jatyr. Eń bastysy, bizdiń túlekterdi Qazaqstandy ınnovasııalar men ózgeristerge jeteleıtin tulǵalar, óz salalarynyń naǵyz sarapshylary jáne oıshyl kóshbasshylary deýge bolady. Men osyndaı tamasha jastardyń Qazaqstannyń bolashaǵyn qurýda Ulybrıtanııanyń bilimi men ozyq tájirıbesin ákelip jatqanyn maqtan tutamyn», dedi Ulybrıtanııanyń Qazaqstandaǵy elshisi Ketı Lıch.
Sonymen qatar Qazaqstandaǵy Brıtan Keńesiniń dırektory Robert Teılor: «Brıtan Keńesiniń bilim berý boıynsha jumysy bilim berý men daǵdylardy damytýdy ınternasıonaldandyrýǵa, Ulybrıtanııanyń tájirıbesi men ınnovasııasyn álemmen bólisýge jáne birlesken jobalarda iske asyrý úshin seriktesterdi biriktirýge baǵyttalǵan. Bıyl Brıtan Keńesi halyqaralyq qyzmetiniń 90 jyldyǵyn, sondaı-aq, Qazaqstandaǵy uzaq merzimdi dıplomatııalyq qatynasynyń 30 jyldyǵyn atap ótedi. Baıqaý fınalısteri Ulybrıtanııadaǵy bilim berý tájirıbesin úlken jetistikterge jetý úshin tıimdi qoldana bilgen daryndy túlekterdiń shaǵyn ókilderi», dep atap ótti.
