Arada dál eki jyl, toǵyz aı jáne on bes kún ótkende sol aýylǵa arnaıy baryp, qýanyp qaıttym. Taldyqudyq eńsesin tiktep alǵan. Gaz, sý kirgen, ınterneti saırap, eń bastysy, tıptik mektep kúrdeli jóndeýden ótip, tympıyp tur. Ishi toly qaınaǵan jumys. Balabaqsha toly – bala, sportzalda – sport... Pán kabınetteri qala mektebindegiden bir de kem emes.
«Egemen Qazaqstan»-nan aýylymyzdyń atyn kórgende, «bizdi de eskeretin jan bar eken ǵoı» dep, kishkene serpilip, álgi maqalany qoldan-qolǵa taratyp, qaırattanyp qaldyq. «Bolashaǵy joq aýyl» atanyp, saǵymyz synyp, jaǵdaıy bary ketip, joǵy amalsyz qalyp jatqan kez edi ǵoı. Sodan aýylymyzda kúrt qozǵalys bastaldy. О́z kózimizge ózimiz senbeı, dybysymyzdy shyǵaryp qýanýǵa da qorqyp júrdik basynda. Endi qaıteıik, qys bolsa búrseńdep, salqyn úıdiń bir bólmesinde otyratyn biz, gaz kelip arqa-jarqa boldyqta qaldyq. Odan keshikpeı aýyzsý da jetti. Úıimizge kádimgi qaladaǵydaı qolaıly jaǵdaı jasap alýǵa kiristik, ınternet te ornatyldy qos munarasymen. Basynda kóship ketken aýyldastar qaıtadan úı satyp alyp, qara orynǵa qaıtyp kelýdi armandap júr endi. «Sender úshin úı baǵasy qymbat bolady» dep qaljyńdap qoıamyz, aldy kóship te kelip jatyr», deıdi taldyqudyqtyqtar. Ne nárse de kóńilge baılanysty ǵoı, Úkimettiń qoldaýyn kórgen soń el rýhtanyp, iske kirisken. Sharýa ońalyp, mal basy ósip, jeke kásipker qatary kóbeıe bastaǵan. Jeke azamattardyń óz kúshimen jańadan salynǵan eki úı erekshe kózge túsedi, tozyp kete jazdaǵan aýylda mundaı qurylys – qubylys.
Taldyqudyq – tarıhy tereń shejireli aýyl. Jeri shuraıly, adamy shyraıly qasıet qonǵan aımaq bir. Áıgili Sarmalaı (Sadyq) sybyzǵyshy, Shamǵon Qajyǵalıevtiń, Jumeken Nájimedenovtiń qolyna alǵash dombyra ustatyp, ustazy bolǵan «Tesik tamaq» Sabyr kúıshi – osy Taldyqudyqtyń perzenti. Sabyr Muqatovtyń zıraty osy aýyldyń qorymynda.
Esin jıyp, ótken-ketkenin túgeldep degendeı, Taldyqudyq talaı dúnıeni josparlap otyr endi. Bastysy, jigerlenip alǵan. Birlese qımyldaıdy. Ár jylǵy túlekteriniń kómek-yqylasy da saırap jatyr. Jańadan Mádenıet úıin salý qarastyrylyp jatqan kórinedi, oǵan deıin jastar óz kúshimen ashyq alańǵa sahna quryp, mádenı is-sharalarǵa jaǵdaı jasap qoıǵan.
«Osynyń bári «Egemenniń ekpininen» bastaldy» dep kúlip qoıady ózderi, aınaldyrǵan eki-úsh jyldyń ishinde ómir ózgerip ketti. Áne-mine degenshe, asfalt jol da salynyp qalar, bálkim. «Jalpaqtal-Oral» trassasyna nebári 60 shaqyrymǵa jetpeıtin jerdemiz ǵoı...»
«Kóringen taýdyń alystyǵy joq, ol kúnge de jetersiz, jylǵa 20 shaqyrymnan bólip jasasa da», dep ázil-shyndy aralastyra qoshtastym.
Jazylǵan jaıdyń jerde qalmaǵany qandaı jaqsy. «Egemen Qazaqstan»-da kóterilgen máselege sergek qaraǵan Úkimetke úlken rahmet.
Taldyqudyqta tań atty araılap, aýyldarǵa jan kire bastady osylaı. Endi joldyń kúrmeýi sheshilse, qıyndyqtan birjola qutylady.
Darıǵa MUShTANOVA,
Qaztalov aýdanynyń Qurmetti azamaty
Batys Qazaqstan oblysy
