Otaý qurǵandaryna 12 jyl bolǵan otbasynyń Myńbaev aýylyna qonystanǵanyna úsh jyldyń júzi bolǵan.
«On jylǵa jýyq Almatyda páter jaldap, kúnimizdi kórdik. Sóıte júrip bes balaly boldyq. Turmystyq jaǵdaıymyzǵa alańdaǵan dosym Azamat Serikuly osy aýyldan bes bólmeli shaǵyn úı alyp berdi. Qutty qonys bolyp, mine, úshemimiz ómirge kelip jatyr», deıdi úshemderdiń ákesi Jarqyn Aqylbekuly.
Kópbalaly otbasynyń tiregi Jarqyn Baǵlaev Uzynaǵash aýylyndaǵy ortalyq bazarda kartop satyp, balalarynyń nápaqasyn taýyp júr. Eki aýyldyń arasynda kúndelikti taksımen qatynap, jumys isteýdiń ońaı emestigin, tapqan tıyn-tebenniń keıde jolaqysynan da artylmaı qalatynyn aıtyp qalǵan qarapaıym aýyl azamatynyń moınyndaǵy jaýapkershilik júgi tipten eselene túskeni aıtpasa da túsinikti. Dese de «bir qozy týsa, bir túp jýsan artyq shyǵady» deıtin qazaqy qalpynan aınymaǵan Jarqynnyń qýanyshynda shek joq.
«Almaty kópsalaly klınıkalyq aýrýhanasynyń perzenthanasynda eki qyz jáne bir uldyń dúnıege kelýi elimiz úshin qýanyshty sát boldy. Úshemdi ómirge ákelgen batyr ana endi 8 balany tárbıelep, ósirip-óndirip, qatarǵa qosýyna tilektespiz. Árıne, úshemdi aman-esen dúnıege ákelý ońaıǵa soqpady. Mamandardyń kásibı deńgeıiniń, biliktiliginiń arqasynda, sonymen qatar qoldanystaǵy jańa tehnologııalardyń kómegimen sábılerdi shıratyp, úıge shyǵýyna bar múmkindikti jumyldyrdyq. Budan ári aýdandaǵy áriptester sábılerdi baqylaýǵa alyp, densaýlyǵyn qadaǵalaıdy», degen Almaty kópsalaly klınıkalyq aýrýhanasynyń bas dırektory Jumaǵalı Ismaılov ujym atynan otbasyna qarjylaı kómek kórsetti.
Budan keıingi kezekte Jambyl aýdany ákiminiń orynbasary Ádilbek Qambaruly aýdanda ótken jyly 4 200 bala ómirge kelse, olardyń ishinde 12 bala egiz bolǵanyn aıryqsha atady. Bıyl da bul úrdis jibin úzbeı jalǵasyp, qańtar aıynda eki áıel egiz bala týsa, onyń artynsha úshemniń ómirge kelýin jaqsylyqqa balady.
«Halqymyzdyń sanyn kóbeıtip jatqan altyn qursaq analar men sábılerimiz aman bolsyn! Aýdan ákimi atynan úshemderdiń jatyn tósekteri tolyq jabdyqtalyp, daıarlanyp qoıdy. Aldaǵy ýaqytta arbalary men qosymsha kerek-jaraqtarmen qamtamasyz etiledi», degen ol aýdan jurtshylyǵynyń júrekjardy quttyqtaýyn jetkizdi.
Kópbalaly ana úshem bosanatynyn estigen sátten Jambyl aýdandyq ortalyq aýrýhanasy dárigerleriniń erekshe baqylaýyna alynǵan. Otyz aptalyq merzimine jetkende joǵary mamandandyrylǵan medısınalyq kómek alý úshin Almaty kópsalaly klınıkalyq aýrýhanasyna aýystyryldy. Dárigerlerdiń baqylaýynda bolǵan áıelge júktiliktiń 32 aptasynda kesar tiligi jasalyp, sábıler dúnıe esigin ashty.
«Balalar 2 170, 1 490, 1 900 gramm salmaqpen dúnıege keldi. Alǵashqy kúnderi sábılerdiń jaǵdaıy aýyr bolyp, ınvazıvti emes SIPAP apparatynda jatty. Tek jetinshi kúni ana óz balalarymen qaıta qaýyshty. Dáriger akýsher-gınekologter, neonatolog-reanımatologter jáne medbıkelerdiń kómegimen jańa týǵan nárestelerdiń árqaısysy úsh aptanyń ishinde 500-700 gramǵa deıin salmaq jınady», deıdi joǵary sanatty akýsher-gınekolog Gúljahan Jumadýlaeva.
Baqytty ata-analar ómirge ińgálap kelgen qyzdaryna Gúlnáz jáne Dilnáz degen esim berse, al uldaryn Temirlan dep ataýdy jón kóripti. Kópbalaly ana Sholpan Mamasheva buǵan deıin de 2020 jyly egiz balany ómirge ákelgen. Alaıda aı-kúnine jetpeı, shala týǵan sharananyń biri shetinep ketken.
«Bul joly men júktilikke muqııat daıyndaldym jáne barlyq qajetti em-sharalardan aldyn ala óttim. Sábıler merziminen buryn dúnıege keldi, sondyqtan jaǵdaıy aýyr boldy. Dárigerlerdiń biliktiliginiń arqasynda aman-esen shırap qaldyq. Bosanǵannan keıingi úshinshi aptada perzenthanadan shańyraǵyma shyǵyp baramyn. Maǵan qolushyn bergen aq jeleńdi abzal jandarǵa, dos-jaran, týystaryma rızashylyǵymdy bildiremin», deıdi úshemdi dúnıege ákelgen kópbalaly batyr ana.
Altyn qursaq ananyń tula boıy tuńǵysh qyzy Arnur – 10 jasta, 5-synypta oqıdy. Odan keıingi Nurıslam – 2, Azamat 1-synypta bilim alyp júr. Egizdiń syńary bolǵan Berikbol men 3 jasar Beıbarys ta izderinen ilesken úshemderdi kórýge asyq. Túrli-tústi sharlaryn kóterip, analarynyń aldynan qýana shyqqan olar «bópemizdi ózimiz terbep, qaraımyz» dep máz. «Balaly úı – bazar» degendeı, osyndaı kól-kósir qýanysh ár shańyraqqa juǵysty bolsyn degen tilek bizdiń de júrek túkpirimizde lúpildedi.
Eske salsaq, byltyr Almaty oblysynda 26 825 bala dúnıege kelgen, onyń ishinde 233-i egizder jáne bir úshem bar.
Almaty oblysy
