Túrli saıası jáne basqa da jaǵdaılarǵa baılanysty Reseıdiń negizgi quramyndaǵy balýandardyń birazy Rýmynııaǵa vıza ala almady. Sol sebepti de olar qart qurlyqtyń basty dodasyna ekinshi jáne úshinshi nómirli balýandaryn attandyrdy. Solardyń qatarynda Ádilet Tóleýbaev ta bar. Omby oblysynda týyp-ósken 28 jastaǵy qandasymyzdyń qyraǵy mamandardyń nazaryna ilikkenine biraz jyldyń júzi boldy. Grek-rım kúresin serik etken ol úsh ret Reseı chempıonatynda júldegerler qatarynan kórindi. 2016 jáne 2023 jyldary qola medaldi ıelendi. 2022 jyly kúmiske qol sozdy. Sýzdalda ótken jarystyń fınalynda 77 kg salmaq dárejesinde kúresken Ádilet álem jáne qurlyq chempıony, Álem kýboginiń ıegeri Abýıazıd Mansıgovqa ese jiberdi. Odan bólek, Ombynyń oǵylany birqatar halyqaralyq týrnırde jeńis tuǵyryna kóterildi.
Jalpy, Tóleýbaevtyń salmaǵynda kileń «sen tur men ataıyndar» jınalǵan. Abýıazıd Mansıgovtan bólek, Roman Vlasov (Olımpıadanyń eki, álemniń úsh jáne Eýropanyń tórt dúrkin chempıony), Aleksandr Chehırkın (álem jáne qurlyq chempıony, Eýropa oıyndarynyń jeńimpazy), Ramazan Abacharaev pen Sergeı Kýtýzov (álem chempıonatynyń qola júldegerleri), Sergeı Stepanov pen Islam Opıev (jastar arasynda álem jáne qurlyq chempıondary) jáne taǵy basqa dúldúlder bar. Mine, sondaı tarlandarmen tiresip júrip, Ádilettiń de sheberlik deńgeıi ósti.
Bıylǵy Eýropa chempıonatynda bapkerlerdiń tańdaýy Tóleýbaevqa tústi. Býharestte ol jastardyń álem birinshiliginiń qola júldegeri, shvesııalyq Per Albın Olofssondy (6:1) jolynan yǵystyrǵanymen, shırek fınalda álem chempıony jáne eki dúrkin qola júldegeri, Eýropanyń eki dúrkin chempıony jáne fınalısi, armenııalyq Malhas Amoıanǵa (2:3) bir ǵana upaı aıyrmashylyǵymen ese jiberdi. Jubanysh beldesýinde ıtalııalyq Rıkkardo Abreshııadan (5:1) aılasyn asyrǵan qandasymyz úshinshi oryn úshin tartysta Moldovanyń tanymal balýany Aleksandr Gýtýdy (13:4) aıqyn basymdyqpen utty. Sóıtip, Ombynyń qazaǵy Ádilet Tóleýbaev Eýropa chempıonatynyń qola júldegeri atandy. Ázirge bul – onyń sporttyq mansabyndaǵy eń úzdik kórsetkish!
