Jeńis saıabaǵyndaǵy eńseli eskertkishke jınalǵan Aýǵan soǵysynyń ardagerleri men áskerıler, aqsaqaldar men qala turǵyndary alqyzyl gúl shoqtaryn qoıyp, qan maıdanda erlik kórsetken, soǵystyń zardabyn tatyp, ómirden ótken jaýyngerlerdiń rýhyna taǵzym etti.
Budan soń Mádenıet úıinde jalǵasyn tapqan jıynǵa Qonaev qalasy ákiminiń orynbasary Sáýle Nursoltanova qatysyp, lebizin bildirdi.
«9 jyl 10 aıǵa sozylǵan Aýǵan soǵysy týraly derekterge súıensek, Keńes odaǵynan 600 myńnan astam adam attanypty. Osydan 35 jyl buryn Aýǵan soǵysynan 21371 ardager aman-esen Otanyna oralǵan eken. Olardyń qataryndaǵy 91 ardager búginde Qonaev qalasynyń turǵyndary», degen qala ákiminiń orynbasary bul is-sharanyń óskeleń urpaqqa berer tárbıelik máni zor ekendigin ataı kele, qaısarlyq pen erliktiń úlgisin kórsetken Aýǵan soǵysy ardagerlerine alǵysyn bildirdi.
Saltanatty jıyn barysynda Aýǵan soǵysynyń ardageri Marat Kalgýlovqa Qonaev qalasynyń Qurmetti azamaty ataǵy berildi.
Sondaı-aq ardagerlerge 35 jyldyq merekelik medali men Alǵys hattar tabys etildi.
Basqosýdyń sońy patrıottyq ánder oryndalǵan konserttik baǵdarlamaǵa ulasty.
