Foto: Ashyq derekkóz
Qazirgi ýaqytta Aısholpan Almatydaǵy Súleımen Demırel atyndaǵy ýnıversıtette qazaq tili men ádebıet páninen muǵalim mamandyǵy boıynsha 4-kýrsta oqıdy. Ol ýnıversıtetti támámdaǵan soń mamandyq boıynsha jumys istegisi keletinin aıtty. «Ulan aýdanynda (Shyǵys Qazaqstan oblysy) Bozanbaı jaqta mektep ashaıyn dep jatyrmyn. Ol orta mektep – bilim men salt-dástúrdi qatar úıretetin ulttyq mektep bolady», deıdi búrkitshi qyz.
Sondaı-aq Aısholpan bir qyzdy qusbegilikke baýlyp jatqanyn atap, «Qazirgi ýaqytta shákirtim bar, Ulan aýdanynda Aızere degen qyzdy daıyndap jatyrmyn», dedi.
13 jasynda qazaqty jahanǵa tanytqan Aısholpan Nurǵaıypqyzy «Tańsholpan» baǵdarlamasyna bergen suhbat barysynda 6 jasynan bastap atqa minip úırengenin, 8 jasynan beri qusbegilikpen aınalysqanyn tilge tıek etti. «Aýylda óstim, taý-tastarda júrdik. Kóp jattyǵý kerek, árıne. Búrkitshi bolyp shyqqan kezde, árıne, ata-anamnan ruqsat suradym. Ata-anam qoldaý kórsetti», deıdi ol.
Aısholpannyń ata-anasy da jýyrda Mońǵolııadan Qazaqstanǵa kóship kelgeni málim. «2018 jyly Qazaqstanǵa alǵash ret kelip, kórdim. Keıin osy jaqta bilim ala bastaǵannan keıin Qazaqstanǵa inim men sińilim, ata-anam da kelse ǵoı dep armandadym. Qazir ata-anam О́skemen qalasyna kóship keldi. Inim men sińilim de kelip, oqýlaryn jalǵastyryp jatyr», deıdi áıgili búrkitshi.
