Foto: pixabay.som
«Aqpannyń basynda oblystyq prokýratýra men qamqorshylyqtyń mobıldi toptary júrgizgen tekserý nátıjesinde bir otbasynan shyqqan úsh bala – 1 qyz jáne 2 ul bary anyqtaldy. Patronattyq tárbıege alǵan otbasy olardy balalar úıinen 2018 jyly alǵan. Ol kezde balalar 14, 12 jáne 8 jasta bolǵan. Uldyń úlkenin qalaǵa 20 km qashyqtyqtaǵy óz fermasynda erkinen tys ustap, mal baǵýǵa májbúrlegen. Fermada eki tabyn jylqy men 18 sıyr bar», dep jazdy Bala quqyqtary jónindegi ýákil.
Tekserý barysynda ulytaýlyqtyń 3 bala úshin járdemaqy alyp kelgeni de anyq boldy. Komıssııa barǵanda balalardyń ahýaly aıanyshty kúıde bolǵan. Dınara Zákıeva olardyń sol kezdegi kúıin denelerinde saý tamtyq joq, kógergen, tyrtyqqa toly, júdeý, sharshańqy, ash, kir-qojalaq, kıimderi jyrtyq edi dep jazdy.
«Balalardyń úlkeni – qyz, kolledjdi támamdaǵan, alaıda is júzinde sabaqqa múlde barmaǵan. Ortanshy ul kolledjde «oqıdy». Quqyq qorǵaý organy bilim mekemesin tekserse, ata-anasy tarapynan únemi balalardyń aýyrǵany týraly anyqtamalar usynyp otyrǵan eken. Qamqorshy qyzdy jumys istemeseń, ne shaǵymdansań, baýyrlaryńdy kórmeısiń dep qorqytqan», delingen onyń jazbasynda.
Bul tekserýge Ulytaý oblysy ákimi Berik Ábdiǵalıuly, prokýratýra, IIM atsalysqan. Is barysynda qamqorshynyń jaqynda taǵy da «patronatqa alýǵa bolatyn basqa da balalar bar ma?» dep surastyrǵany anyqtaldy.
Bala quqyqtary jónindegi ýákil qazir IIM, Prokýratýra men basqa da memlekettik organdar birlesip búkil el boıynsha pılottyq rejımde jumys isteıtin mobıldi toptar qurylǵanyn málimdedi.
