Júlde qory 100 mln teńgeni quraıtyn sol dop dodasy bastalyp ta ketti. Túrkııanyń Bılek qalasyndaǵy «Tıtanık Delıýks» stadıonynda el chempıony «Ordabasy» men Birinshi lıganyń jeńimpazy «Elimaı» kezdesti. Osy oıynda shymkenttikter semeılikterdiń qaqpasyna jaýapsyz tórt dop soqty – 4:0. Bul goldardyń avtorlary – Sergeı Malyı, Ashat Taǵybergen, Vladıslav Vasılev jáne Vsevolod Sadovskıı. Kóp keshikpeı Premer-lıganyń qola júldegeri «Aqtóbe» men Qazaqstan kýboginiń ıegeri «Tobyl» jasyl alańǵa shyqty. Báseke barysynda Ahmed ál-Messaýdı men Islam Chesnokov qostanaılyqtardy eki márte alǵa shyǵarǵanymen, kóp uzamaı aqtóbelikterdiń sapyndaǵy qos legıoner – reseılik shabýylshy Ydyrys Ýmaev pen nıgerııalyq qorǵaýshy Ýche Anrı Agbo tarazy basyn teńistirdi. Odan keıin «Tobyl» qarqynyn kúrt kúsheıtti. Sonyń nátıjesinde serbııalyq jartylaı qorǵaýshy Igor Ivanovıch úshinshi dopty qaqpaǵa toǵytsa, kezinde Marokko quramasynyń sapynda oınaǵan ál-Messaýdı kezdesýdiń sońǵy núktesin qoıdy – 4:2.
«Ordabasy» men «Tobyl» arasyndaǵy fınaldyq saıys 21 aqpanda Astana ýaqyty boıynsha 20:30-de ótedi. Osy týrnırde bas júlde alǵan komanda 60 mln-dy oljalasa, ekinshi oryndy ıelengen ujym 40 mln-dy enshileıdi.
