Osy oraıda «Bilim kerýeni» korporatıvtik qorynyń bas dırektory Zarına Bııýmbaevanyń aıtýynsha, byltyrdan beri Jylyoı aýdanynyń ortalyǵy – Qulsary qalasyndaǵy №8 orta mektepte «Jylyoı STEAM mekeni» bilim berýdi damytý jobasyn júzege asyra bastady. Bul jobaǵa osy aýdandaǵy «Teńiz» ken ornynan «qara altyn» óndiretin «Teńizshevroıl» JShS demeýshilik kórsetti. Bul zerthana shaǵyn shahardaǵy oqýshylardyń túrli robot pen gadjetti qurastyrýyna jol ashyp otyr. Atalǵan joba aıasynda bilim ordalarynda ınnovasııalyq kabınetter uıymdastyrylyp, muǵalimder men stýdentterge arnalǵan oqý trenıngteri, festıvaldar, lagerler, hakatondar ótkizilip keledi. Mektep muǵalimderi balalardy oqytpas buryn biliktiligin arttyrdy. Sheteldik lektorlar shaqyryp jergilikti oqytýshylar STEAM sertıfıkattaý baǵdarlamasymen bir jyldyq «Jana Talap» kýrsynan ótti.
«Biz Qazaqstanda STEAM bilim berýdi damytýdyń ulttyq jol kartasymen jumys isteımiz. Bul jobanyń basty maqsaty – mektep jasyndaǵy balalardyń jańa standarttar boıynsha sapaly bilim alýyna, muǵalimderdiń kásibı deńgeıin kóterýine teń múmkindik berý. Qazir jobaǵa oqýshylardyń ynta tanytýshylar qatary kóbeıdi. Onyń ishinde Jylyoı aýdanyndaǵy mektep dırektorlary men oqý isiniń meńgerýshileri, muǵalimder men oqýshylar bar. Oqýshylardyń ata-analarymen tyǵyz baılanys ornatyp otyrmyz», deıdi Zarına Bııýmbaeva.
Onyń pikirine súıensek, «Jylyoı STEAM mekeni» jobasyn iske qospas buryn munaıly óńirdegi STEAM deńgeıine zertteý júrgizilipti. Saraptama kórsetkendeı, kóptegen mektep dırektoryn bilikti kadrlardyń jetispeýshiligi alańdatqan. Muǵalimderge arnalǵan STEAM kýrstary, semınarlar jáne trenıngter kóp ótpedi. Osyǵan baılanysty orta mektepterdiń basshylary muǵalimder men oqýshylarǵa sheberlik sabaqtaryn ótkizý úshin robottehnıkamen aınalysatyn ózge oqytýshylardy tartýǵa májbúr bolady.
Qulsary qalasyndaǵy №8 orta mekteptegi ozyq tehnologııalarmen jabdyqtalǵan ınformatıka kabıneti kórgen jannyń qyzyǵýshylyǵyn oıatady. Munda halyqaralyq FIRST baıqaýynyń standarttary boıynsha hımııa-bıologııa jáne fızıka-matematıka kesheni, robottehnıka aımaǵy bar. Ámbebap STEAM zerthanasynda balalar ártúrli ǵylymı jobalardy oqıdy. Robottehnıka synyby LEGO SPIKE PRIME oqý jıyntyǵymen, Rev Robotics konstrýktorlarymen, ClassVR vırtýaldy ınnovasııalyq júıesimen, drondarmen, VegeBox smart jylyjaıymen jáne 3D prınterlermen jabdyqtalǵan. Mektep oqýshylary osynyń bárin tájirıbelik maqsattaǵy robottehnıka sabaqtarynda paıdalanady.
Oqýshylar ınformatıka kabınetine muǵalimniń dárisin ǵana emes, robot qurastyrý úshin de keledi. Pán muǵalimi Mádına Saǵynǵalı oqýshynyń bárine kómektesýge ýaqyt tabady. Ol buryn robottehnıkaǵa baılanysty kýrstar men trenıngterde biliktiligin jetildirgen.
«Innovasııalyq tehnologııalar zamanynda bilim salasyndaǵy mundaı jobalar óte qajet. Jylyoı aýdanyndaǵy alǵashqy zamanaýı STEM synyby bizdiń mektepte ashyldy. Bul oqýshylar úshin tosynsyı boldy. Qazir robottehnıka úıirmesine 500-den astam oqýshy erekshe qyzyǵýshylyqpen qatysyp júr. Oqýshylar sıfrlyq jabdyqty paıdalanýdy, robottardy jobalaýdy jáne baǵdarlama jasaýdy úırenedi. Mektepten aqparattyq tehnologııalardy meńgerip shyqqan oqýshynyń bolashaǵy jarqyn bolady», deıdi Mádına Saǵynǵalı.
Mektepte STEM kabıneti qajetti qural-jabdyqpen qamtylyp, túrli taqyrypqa saı bezendirilgen. Balalar ár sabaqta túrli modıfıkasııadaǵy robotty qurastyrý jınaqtaryn, sońǵy úlgidegi planshetterdi paıdalanady. Robottehnıka úıirmesi aptasyna úsh ret jumys isteıdi. Jas ónertapqyshtar tek Atyraý oblysynda ǵana emes, respýblıka kólemindegi baıqaýlarǵa da belsene qatysyp júr.
«Máselen, ótken jyly ZHylyoy STEAM lagerinde mektep oqýshylary arasynda hakaton uıymdastyrylypty. Bul sharaǵa №8 orta mekteptiń 7-synyp oqýshylary qatysyp, Astana qalasyndaǵy PRO.NRG Fest ǵylym, óner jáne tehnologııa festıvaline joldamany jeńip alǵan. Bul – STEAM bilim berý salasyndaǵy aýqymdy ǵylymı-kópshilik is-shara. Festıval aıasynda Central Asia FIRST GLOBAL CHALLENGE halyqaralyq baıqaýy ótkizilgen. Sol saıysta «E=mc2» komandasy arnaıy syılyqpen marapattalǵan. Mundaı baıqaý oqýshylardy shyǵarmashylyǵyn odan ári jetildirýge shabyttandyrdy», deıdi M.Saǵynǵalı.
Al jaqynda mektep oqýshylary «FIRST Robotics» halyqaralyq baıqaýynyń oblystyq irikteý kezeńinde baq synady. Atyraý qalasyndaǵy Abaı ortalyǵyndaǵy baıqaýda 52 komandanyń arasynan FIRST Lego League Challenge sanatynda «TECH ECLIPSE» komandasy 3-orynǵa ıe boldy. Endi olar elordada ótetin chempıonattyń respýblıkalyq kezeńine qatysady.
Jobanyń bastamashylary oblystaǵy muǵalimder men oqýshylar úshin arnaıy zerthana ashty. Byltyr sáýir aıynda FIRST Robotics halyqaralyq baıqaýy aıasynda aımaqtyq ıntegrasııalanǵan robottehnıka hakatony ótti. Qulsary qalasynyń komandasy Ortalyq Azııa FIRST Global Challenge ulttyq kezeńine qatysty. Komanda 11 match ótkizip, Judge award marapatyna ıe boldy. Sondaı-aq 7-11 synyp oqýshylaryna arnalǵan STEAM bilim berý baǵdarlamasy júzege asyryldy. Zerthanalarǵa oqý-ádistemelik keshen, baqylaý-ólsheý materıaldary ázirlendi. Joba aıasynda oblystaǵy 23 mektep muǵalimderiniń biliktilik arttyrý kýrsy ótti. Jalpy, muǵalimderdiń kásibı daǵdysyn jetildirý baǵytyndaǵy STEAM kýrsy aı saıyn uıymdastyrylady.
Atyraý oblysy
