Júlde qory 100 mln teńgeni quraǵan dop dodasynyń bas júldesin el chempıony Shymkenttiń «Ordabasy» men el kýboginiń ıegeri Qostanaıdyń «Tobyly» ózara sarapqa saldy. Birden aıta keteıik, bul kórermender kóńilinen shyǵatyndaı asa bir qyzyqty báseke bolǵan joq. Matchtyń basynan aıaǵyna deıin alma-kezek shabýyldar uıymdastyrylǵanymen, aldyńǵy shep qarsy jaqtyń aıyp alańyna kelgende qatelikke boı aldyryp, kózdegen maqsatyna jete almady. Belgilengen ýaqyt aıaqtalǵannan keıin 11 metrlik núkteden dop tebýge týra keldi. Mergenderdiń saıysynda «Ordabasynyń» asyǵy alshysynan túsip, olar bas júldemen qatar, 60 mln teńgelik syıaqyǵa ıe boldy. Fınalda utylǵan «Tobyldyń» oıynshylaryna 40 mln teńge tabys etildi.
Birinshi lıgada top jarǵan Semeıdiń «Elimaıy» men Premer-lıganyń qola júldegeri «Aqtóbe» arasyndaǵy matchta qos klýb bir-biriniń qaqpasyna eki-eki goldan soǵyp, teń tarasty – 2:2. Sodan qola júldeger «fýtbol lotereıasy» arqyly anyqtaldy. Bul tartysta Jaıyq jaǵalaýynan kelgen jigitterdiń joly boldy – 3:2.
