Sýretti túsirgen – Dastan Janasyl
Saltanatty sharanyń shymyldyǵy uly tulǵanyń ómir jolynan syr shertetin «Berdibek álemine saıahat» atty derekti fılmniń kórsetilýimen ashyldy. Aýdan basshylyǵynyń shaqyrýymen alǵash ret Berdibektiń týǵan aýylynda tusaýy kesilip, kórermenge jol tartqan fılmdi halyq ystyq yqylaspen qabyldady.
«Berdibek aýylyna saıahat» derekti fılmi – «Qońyr Media Group» kompanııasynyń tól týyndysy. Ideıa avtory ári rejısseri – atalǵan ujymnyń jetekshisi, belgili prodıýser Serjan Moldasanuly. Buǵan deıin aqıyq aqyn Muqaǵalı Maqataevtyń 90 jyldyǵyna arnap «Qarasaz kósheleri» atty ádebı derekti fılm túsirip, kórermenniń alǵysyn alǵan shyǵarmashylyq top bıyl Berdibektiń rýhyna osylaısha eskertkish qoıdy. Shyǵarmashylyq ujymnyń demeýshisi – Toqtar Muhamedı esimdi azamat basqaratyn «Yntymaq Corporation» kompanııasy.
«Aýdanymyzdaǵy aıadaı ǵana Qostóbe aýylynda dúnıege kelip, eńbek jolyn týǵan ólkesi Narynqolda bastaǵan jerlesimizdiń halyqaralyq júlde ıelengen «Meniń atym – Qoja» fılmi arqyly týǵan elimizdiń kórkem tabıǵatyn, halqynyń boıamasyz bolmysyn dúnıe júzine tanytty. Fılmniń shyqqanyna jarty ǵasyrdan assa da, kórermenin áli jalyqtyrǵan joq. Munyń ózi Berdibek Soqpaqbaevtyń dara talant ıesi ekeniniń anyq dáleli», – dedi Raıymbek aýdanynyń ákimi Berik Dúısenbaev.
Is-shara barysynda oblystyq mádenıet, arhıvter jáne qujattama basqarmasynyń bólim basshysy, aqyn Tóleýjan Núsipjanuly, Qojanyń rólin somdaǵan akter Nurlan Sanjaruly, Qazaqstan Jazýshylar odaǵynyń Almaty oblystyq fılıalynyń tóraǵasy, jazýshy Qanat Ábilqaıyrlar sanaly ǵumyryn ádildik pen ádebıetke arnaǵan kórnekti qalamgerdiń shyǵarmashylyǵynan syr shertti. Sondaı-aq mereıtoıy IýNESKO kóleminde toılanatyn jazýshynyń jerlesterin ǵasyr toıymen quttyqtady.
«Oralhan Bókeı dese, esimizge birden qasıetti Altaı túsedi. Oralhandy janyna jaqyn tutqan ár adam Altaıdyń topyraǵyn basyp, taýyna shyqqysy keledi. Al Muqaǵalı men Qarasaz egiz. Aqıyq aqynnyń óleńderin jatqa biletin aýylǵa óleńsúıer qaýymnyń atbasyn burmaǵany kemde-kem shyǵar. Sol sııaqty qazaq ádebıetiniń klassıgi Berdibek Soqpaqbaevtyń Qostóbesi qandaı? Ornynda tur ma eken? Berdibekti súıip oqyǵan ár adamnyń kókeıine osy suraq keleri anyq. «Berdibek aýylyna saıahat» – eń aldymen, Berdibegin saǵynǵan, onyń aýylyn kórgisi kelip ańsaıtyn jyraqtaǵy oqyrmanǵa jaýap. Jarty álem súıip kórgen «Meniń atym – Qojany» dúnıege ákelgen súıikti qalamgerdiń rýhyna taǵzym. «Berdibek aýylyna saıahat» aldaǵy ýaqytta respýblıka deńgeıinde qalyń kórermenge jol tartatyn bolady», – deıdi fılm avtory Serjan Moldasanuly.
Aıta ketý kerek, «Qońyr Media Group» shyǵarmashylyq ujymy rýhanııatymyzǵa tirek bolǵan tulǵalarymyz týraly tyń dúnıeler jasaýdy dástúrge aınaldyryp keledi. Memlekettik emes, jeke demeýshilerdiń qoldaýymen júzege asyrylatyn mundaı jobalar alda da jalǵasyn taba bermek.
Almaty oblysy
