Ǵylymı derekke súıensek, balzam tereginiń bıologııalyq belsendi zattary, ıaǵnı flavonoıdtar qaterli isikke shaldyqqan naýqastardaǵy qannyń negizgi kórsetkishin qalypqa keltirýge kómektesedi. Atalǵan ǵalymdar osy ósimdik syǵyndysynyń dárilik áleýetin ashyp, paıdaǵa jaratty. Olardyń aıtýynsha, balzam aǵashynda bakterııaǵa, qabynýǵa qarsy shyǵyp, jaralardy emdeıtin qasıet bar. Ony medısınada ǵana emes, aýyl sharýashylyǵynda da qoldanýǵa bolady.
Otandyq ǵalymdar balzam tereginiń hımııalyq quramyn 2000-jyldardyń basynda zertteı bastaǵan. Solaı syǵyndy negizinde ártúrli bıologııalyq preparat jasap kórgen. Nátıjesinde, emdik saǵyz ben pechene paıda boldy. Kondıterler pecheneniń eksperımenttik nusqasyn jasap shyǵaryp, onyń dástúrli túrine balzam terek syǵyndysy qosyldy.
Ǵalymdar oblystyq onkologııalyq dıspansermen birlesip zertteýler júrgizdi. Sáýlelik terapııadan ótken naýqastar flavonoıdtarmen jáne terek búrshikterinen bólingen basqa da paıdaly zattarmen baıytylǵan pecheneni jep kórdi. Nátıjesinde, naýqastardyń qan kórsetkishteri basqa baqylaý tobymen salystyrǵanda birshama qalypqa kelgen. Gemoglobın men erıtrosıtter 7,5%-ǵa, leıkosıtter 20%-ǵa ósken. Osylaısha, balzamdyq terek syǵyndysy bar pechene onkologııalyq naýqastar qanynyń negizgi kórsetkishin qalypqa keltirýge kómektesken.
