Qabyldaýlar barysynda aýyl turǵyndary qarabastyń qamy emes, halyqqa ortaq ótkir de ózekti máselelerdi kóterdi. Máselen, Qaınazar aýylynda kommýnaldyq máselelerdiń kóptigi aıtyldy. Turǵyndar jyldar boıy eldi mekenge aýyl mártebesin ala almaı júrgenderin jetkizdi. «Sonyń kesirinen barlyq máseleni óz betimizshe sheshýge májbúrmiz», deıdi kúıingen jurt.
Rahat aýyldyq okýrginiń turǵyny Tasbaı Jánibekov aýyl mańyndaǵy saıajaı halqynyń belgili statýsy bolmaǵandyqtan, zıratqa tıisti jer bólinbeıtinin aıtty. «Aýylda zırat joq. Bul máseleni kóterip júrgenimizge 2 jyl boldy. Sonyń saldarynan halyq ózge aýyldardaǵy zıratqa jaqynyn jerlep, sabylyp júr. Osy kúnge deıin qoldanǵan jerler sanıtarlyq normadan asyp ketken. Endi biz onda adam jerleı almaıdy ekenbiz. Máseleniń qashan sheshiletini belgisiz. Biraq ólim kútip otyrmaıdy ǵoı. Biz «áne-mine sheshiledi» degen jattandy jaýaptan, shyny kerek, sharshadyq», deıdi aýyl turǵyny.
Aýyl halqynyń basym bóligi jańa mektepter men sport alańdaryn salý, ishki jol qurylysy, kóshelerdi jaryqtandyrý, aýyl sharýashylyǵy, sýbsıdııa alý, aǵyn sý, jaıylym jer, uıaly baılanys pen ınternet sapasynyń nasharlyǵy, dárigerlik ambýlatorııanyń joqtyǵy, turǵyn úı-kommýnaldyq sharýashylyq, jumyssyzdyq syndy tize bersek, sheshilgeninen sheshimin kútkeni kóp áleýmettik máseleni kóterdi.
О́tken jyly mundaı mobıldi qoǵamdyq qabyldaýlar aıasynda amanattyqtar 18 aýyl halqymen kezdesý ótkizgen. Bıyl 20-ǵa jýyq eldi mekendi qamtymaq.
«О́tken jyly partııaǵa turǵyndardan 3 546 ótinish tústi. Bul máselelerdiń 65 paıyzy qazirgi ýaqytta sheshimin tapty. Alaıda shalǵaıda ornalasqan halyq partııanyń aýdandyq nemese oblystyq fılıalyna jol uzaqtyǵyna baılanysty árdaıym kele bermeıdi. Sondyqtan biz turǵyndardyń túıindi máselelerin alǵa tartyp kelýin kútip otyrmaı, ózimiz barýǵa tyrysamyz. Mundaı kezdesýler halyqqa tıimdi. О́ıtkeni bul mobıldi qoǵamdyq qabyldaýdyń basty maqsaty – shalǵaı ornalasqan eldi mekenderdegi turǵyndardy qabyldap, olardyń áleýmettik, qoǵamdyq jáne ózge de ortaq túıtkildi máseleleriniń sheshilýine yqpal etý, baǵyt-baǵdar men keńester berý», deıdi oblystyq partııa fılıaly tóraǵasynyń orynbasary Aslan Kóbentaev.
Osy oraıda top ókilderi aýyl turǵyndary kótergen árbir máseleni nazarǵa alyp, olardyń zań aıasynda sheshilýine jumys isteletinin jetkizdi. Keıbir suraqqa naqty keńester berip, máseleni sol jerde sheshýge yqpal etti.
Qoǵamdyq qabyldaýǵa oblystyq ákimdiktiń jer qatynastary, sıfrlyq tehnologııalar, memlekettik sáýlet-qurylys baqylaý, energetıka jáne TÚKSh basqarmalarynyń ókilderi de qatysty.
Almaty oblysy
