Pedagogıkalyq korpýs

Osy jyldyń aqpany men naýryzy ara­lyǵynda 50-den astam eldiń qaty­sýy­­men «TALIS-2024» tórtinshi sıkli ótedi. Oǵan elimizdegi 378 mekteptiń 8 myń-ǵa jýyq muǵalimi men dırektor­y qa­ty­sady. Muǵalimderdiń eńbek jaǵ­daı­la­ryn jáne mektepterdegi bilim berý orta­syn baǵalaıtyn zertteýdiń nátıje­leri 2026 jyly jarııalanady. Taldaý res­­pýb­lıkanyń segiz makroóńiri boıynsha usy­nylady. Qazaqstan bul zertteý­ge­ 2018 jyldan beri qaty­syp keledi. Ár alty jyl saıyn ekono­mı­kalyq yn­ty­­maqtastyq jáne damý uıy­my­nyń qol­daýymen ótkizilip keledi. Peda­go­gı­ka­lyq korpýsynyń kúshti jáne álsiz tus­ta­ryn anyqtaıtyn «TALIS» eń aýqym­dy ha­lyq­­aralyq zertteýlerdiń birine aı­nalǵan. Mektepterdegi pedagogter men bi­lim berý ortasynyń jumys jaǵdaı­la­ryn táýel­siz baǵalaý bilim salasynyń órisin keńeı­tedi.

– Bul sıkldiń ereksheligi bilim berý júıesiniń qazirgi máseleleri týraly jańa suraqtardyń qosylýy: ártúrlilik pen teńdik, oqýshylardyń áleýmettik jáne emosıonaldyq oqýy, bilim berý maqsatynda tehnologııalardy paıdalaný jáne qorshaǵan orta men turaqty damý boıynsha bilim berý. Zertteýge Y.Altynsarın atyndaǵy ulttyq bilim akademııasynyń, Respýblıkalyq bilim mazmunyn saraptaý ǵylymı-praktıkalyq ortalyǵynyń, «О́rleý» BAUO sarapshylary jáne L.N.Gýmılev atyndaǵy EUÝ oqytýshylary birlesip ázirlegen ulttyq máseleler engiziledi, – dedi Bilim berý salasyndaǵy sapany qamtamasyz etý komıtetiniń tóraǵasy Ernur Dáýenov.

Zertteýdiń nátıjesi qalaı bolary beımálim. Degenmen búginde eńbek jaǵdaıy men bilim berýge baılanysty birqatar ózgeris bolyp jatyr Oqý-aǵartý mınıstrligi bul baǵyt boıynsha birqatar is atqardy. Mysaly, Ǵylym jáne joǵary bilim mınıstrligimen birlesip sapa quzyrettilik modelin paıdalaný arqyly pedagogıkalyq bilim berýdi qaıta formattaý jumysy júrgizilip jatyr. Stýdentterdiń akademııalyq utqyrlyǵyn damytý men praktıkanyń jańa formatyn engizý isi de kún tártibindegi máselede tur. Odan bólek, mınıstrlik Memleket basshysynyń tapsyrmasymen ótken jyldan bastap bilim berýdegi ózgeristerdiń kóshbasshylaryn irikteýdi bastady. Qazir «Bilim berýdegi jańa ózgeristerdiń 1000 kóshbasshysy» joba­sy aıasynda irikteýden sátti ótkender iske saqadaı saı tur. Kadrlyq rezervke ótken úmitkerler otandyq bilim sapasyn arttyrý jáne pedagog kadrlardy kásibı daıarlaýǵa basa nazar aýdarý qajet.

– О́tken jyldyń basynda Oqý-aǵar­tý mınıstrligi elimizdegi bilim sapasyn odan ári arttyrý úshin 5 negizgi ba­ǵytty aıqyndady. Olardyń ishinde menedj­mentti nyǵaıtý jáne kadrlyq rezerv­ti qalyptastyrý da bar. Memleket basshy­synyń tapsyrmasy boıynsha biz «1000 ózgerister kóshbasshysy» jobasyn iske qos­tyq. Bul – otandyq bilim júıesin damy­týdyń jańa kezeńi. Segiz aıdyń ishin­de sizder irikteýden ótip, jeke, kásibı, bas­qa­rýshylyq, analıtıkalyq daǵdylar men quzyretterińizdi damyttyńyzdar. Endi sizder naǵyz kóshbasshylar retinde eli­miz­degi bilim berý júıesiniń sapasyn art­tyrýǵa óz úlesińizdi qosýlaryńyz kerek. Eń bastysy – balalarymyz ben peda­gog­terimizge jaıly jáne qaýipsiz orta qa­lyp­­tastyrý, – deıdi Oqý-aǵartý mınıstri Ǵanı Beısembaev.

Jobanyń alǵashqy kezeńine barlyǵy 8 068 ótinim berilgen. Úmitkerler quzyrettilikti baǵalaý, úsh deńgeıli oqytý, elimizdiń jetekshi mektepterinde taǵylymdamadan ótý, qorytyndy baǵalaý jáne mınıstrlik janyndaǵy komıssııamen áńgimelesý syndy synaqtardan ótti. Úmitkerlerdi irikteý jáne bilik­ti­ligin arttyrýdy «Pedagogıkalyq sheber­lik ortalyǵy» ótkizdi. Barlyq bes kezeń­niń qorytyndysy esepke alynyp, Respýb­lı­kalyq kadr rezervine 208 kandıdat kirdi. Osy tizimge ilikken Astana qalasynyń A.Seıdimbek atyndaǵy №54 mektep-lıseı dırektorynyń oqý-tárbıe isi jónindegi orynbasary Qaırat Muqashev bilim salasyndaǵy baǵytymdy anyqtaý úshin jobaǵa qatystym deıdi.

– Jobaǵa qatysý meniń bas­qarý tási­limdi túbegeıli ózgertti. Bala­lary­myzǵa qo­laıly jaǵdaı jasaý jáne ujymmen bir­ge qaı baǵytta damıtynymyz týraly oıla­na bastadym. Eń bastysy, bul joba árip­tes­terimniń bolashaqqa jáne óz kúsh­te­rine degen senimin arttyrdy, – dedi úmit­ker.

Jasampaz jańa býyn elimizdegi kadr tapshylyǵy máselesin sheshýge kómektesip, jańa mektepterdi, onyń ishinde joǵaryda jazylyp turǵan «Jaıly mektep» ulttyq jobasy sheńberinde salynyp jatqan mektepterdi basqarýǵa jiberiledi.