BAQ ókilderimen kezdesti

Ákim jýrnalısterge oblystyń áleý­mettik-ekonomıkalyq damý barysy, «Qyzyljar» AEA qadamdary, áleý­­mettik jáne basqa máseleler jó­ninde tolyq aqparat berdi. Byl­tyr tek aýyl sharýashylyǵy ǵana bel­gilengen mejeni oryndaı almaǵan, qal­ǵan salanyń bári de jospardy asyra oryn­dap, ekonomıkanyń damý qar­qynyn qamtamasyz etken. Al 2024 jyly 551,9 mlrd teńgege 11 ınves­tı­sııa­lyq jobany iske asyrý belgilengen.

Baıandamasyn aıaqta­ǵannan keıin Ǵ.Nurmuhambetov jýrnalısterdiń suraqtaryna jaýap berdi. Sonyń ishinde qarǵyn sýǵa qamdaný máselesinde Pe­tropavl qalasy ákimdiginiń sal­ǵyrttyq tanytyp otyrǵanyn aıttyq. О́ıtkeni jekemenshik úılerdiń kóp aýdandarynda aýladan shyǵarylǵan qar taýdaı bolyp úıilip, tasylyp áketilmeı tur. Qala ákimdigi osy jumystardy atqarýǵa tenderge jarııalap, kompanııa­lardy belgilegenimen, qar ýaqytynda tasylmaıdy. Eger erteń kún kúrt jylyp ketse, taý bolyp úıilgen qardyń sýy úı­lerge kirip ketpeı me degen alańdaý­shylyq bar. Oblys ákimi bul suraq­tyń óte ózekti ekenin moıyndap, kezdesýge ózimen birge kelgen qala ákimi Serik Muhamedıevke joldady. Biraq sońǵynyń jaýaby túsiniksiz kúıinde qal­dy, óıtkeni onyń sózi qar tasıtyn kom­panııalardy endi taptyq degenge saıady.

Jalpy, qala basshysynyń qar shy­ǵarý jumystaryna júrdim-bardym qa­raıtyny kórinip júr. Sha­harda tek jaıaý júrginshilerge arnalǵan «Qazaqstan Konstı­tý­sııasy» kóshesi bıyl du­rys tazalanbaǵandyqtan kók muz bolyp, jaıaý­lardy kibirtiktetip tastaǵan.

Sonymen birge oblystyń mádenıet oshaqtarynda, ásirese S.Muqanov atyn­daǵy oblystyq ǵylymı ámbebap, Ǵ.Músirepov atyn­daǵy balalar jáne jasós­pirimder, I.Shýhov atyndaǵy qa­lalyq kitaphanalarda zııaly qaýym ókilderi, oqytýshylar men muǵalimder, kýrsanttar, stýdentter men oqýshylar qatysýymen ótkiziletin mádenı is-sha­ralarǵa jergilikti bılik ókilderiniń, ishki saıasat, mádenıet basqarmalarynyń ókilderi múlde qatyspaıtynyn aıt­tyq. Sondyqtan halyqtyń aıtqan usynys-pikirleri jergilikti bıliktiń qulaǵyna jetpeıdi, mundaı is-sharaǵa qatysýshylar únemi narazylyq bildirip jatatynyn jetkizdik. Ǵ.Nurmuhambetov bul máseleni múlde bilmeıtinin ja­syrǵan joq. Kezdesýge qatysyp otyrǵan ákimdiktiń apparat jetek­shisi Rýslan Álishevke tapsyrma berip, ótki­zi­letin barlyq is-sharaǵa bılik ókil­de­riniń qatysýyn qam­tamasyz etýdi tapsyrdy.

Biz kótergen úshinshi másele – Til basqarmasyn qaıta ashýǵa arnaldy. Eldiń shetindegi, jeldiń ótindegi aımaqta ony jaýyp tas­taý, memlekettik tildiń órisin ta­ryltýmen barabar. Aýyl sha­rýashylyǵy mınıstri­niń qyzmetine aýysyp ketken burynǵy ákim Aıdarbek Sapa­rov bul máseleni túzetpek bol­ǵan edi, alaıda úlgere almaı ketti. Qazirgi ákim bul máse­leniń oń sheshiletinine ýáde berdi.

«Qazaqstan dáýiri» gazetiniń oblys­taǵy menshikti tilshisi Nursaıyn Shárip onomastıkalyq máselelerdiń ońalmaı turǵanyn aıta kelip, tym bolmasa Aby­laıdyń atyna da Petropavl qala­synda bir kóshe áli kúnge berilmeı turǵanyna qynjylys bildirdi. Ákim bul máselelerge de óziniń oń qaraıtynyn, aldaǵy ýaqytta qolǵa alynatynyn málimdedi.

Jýrnalısterdiń bári de ózekti má­selelerdi qozǵady. Mektep aýlala­rynyń jón­delýi, jańa sporttyq alań­dar­dyń túzilýi, qalanyń kórik­tendirilýi, aýrýhanalardyń nazardan tys qalyp kele jatqany jáne basqa da má­seleler or­taǵa salyndy. Sonyń ishinde ob­lystyń mýnısıpaldy telearnasynyń dırektory Evgenıı Sazonov qalanyń keıbir kóshelerinde trotýarlardyń joq ekenine nazar aýdardy. Biz de osydan birneshe jyl buryn qaladaǵy eń kórikti kóshelerdiń biri – M.Ju­ma­baev dańǵylynyń jolyn jóndegende, jumysshylardyń jaıaý soqpaq jasaýdy qalaı «umy­typ» ketkenine qaıran qalyp, jazǵanbyz. Tipti onyń josparǵa engizilmeýi múmkin emestigin, alaıda bólingen qarajat bireýlerdiń qaltasyna túsip ketýi múmkin ekenin de aıtqanbyz. Oblys ákimi bul máseleni satylap jóndeý týraly qala ákimine tapsyrdy.

Sóıtip, BAQ ókilderi oblys áki­mine kúrdeli máselelerge qatysty su­raqtaryn qoıyp, jeńildep qaldy. Al Ǵ.Nur­muhambetov osy ýaqytqa deıin kóńil bólmeı kelgen birshama dúnıeni bilip, kóptegen aqparat alyp, eki jaq ta oljaly boldy.

Soltústik Qazaqstan oblysy