Talǵar aýdany Qyzyl Qaırat aýylynda múgedek balalardy emdeýge arnalǵan «Aq jol-M» ońaltý ortalyǵynyń jańa ǵımaraty paıdalanýǵa berildi. Jańa ortalyqtyń ashylý saltanatyna Almaty oblysy ákiminiń birinshi orynbasary Nurlan Ábdirahym, «Qazaqstan halqyna» QQ tóraǵasy Bolat Jámishev, «Nur Múbarak» ýnıversıteti men meshitiniń bas ımamy, «Aq jol-M» qamqorshylyq keńesiniń múshesi Qaırat Joldybaıuly, mesenattar men demeýshiler, oblystyq jumyspen qamtýdy úılestirý jáne áleýmettik baǵdarlamalar basqarmasynyń, áleýmettik qorǵaý salasyn damytýdyń ulttyq ǵylymı ortalyǵynyń, densaýlyq saqtaý basqarmasynyń ókilderi men ata-analar qatysty.
«Jańa ortalyqta 200-deı erekshe balaǵa arnaýly áleýmettik qyzmetter kórsetiledi. Qordyń basshylyǵy mesenattardyń qoldaýymen burynǵy ǵımarattyń janyna jertólesi bar jańa úsh qabatty ǵımarat saldy. Endigi jerde ońaltý ortalyǵy eki ese keńeıip, ıaǵnı 400-ge jýyq balany qabyldaý múmkindigine ıe. Qazirgi ýaqytta bul ortalyq oblystyq ákimdiktiń memlekettik áleýmettik tapsyrysy sheńberinde múgedektigi bar 58 balaǵa arnaýly áleýmettik qyzmetter kórsetip jatyr. Bolashaqta memlekettik tapsyrys kólemin arttyryp, kóp balany qamtýǵa múmkindik bolady», degen Nurlan Erǵalıuly Memleket basshysynyń bastamasymen qurylǵan «Qazaqstan halqyna» qorynyń azamattarǵa kómek kórsetýdegi jumystaryna alǵysyn bildirdi.
Jańa ǵımaratty zamanaýı qurylǵylarmen jabdyqtaýdy qor óz moınyna alǵan. Jalpy quny 950 mln teńgege jýyq qarjyǵa shveısarııalyq robotty ońaltý kesheni, koreıalyq júrýge úıretý kesheni, reseılik lokomotorly terapııa júıesi syndy 80-nen asa qurylǵy alynyp, tuzdy shahta, sensorlyq bólmeler jáne arnaıy kabınetter jabdyqtalǵan.
«Bul «Qazaqstan halqyna» qorynyń qoldaýymen óńirimizde iske asqan alǵashqy joba emes. Osyǵan deıin Almaty oblysynyń onkologııalyq ortalyǵyna kompıýterlik tomograf, mammograf jáne saraptamalyq deńgeıdegi ýltradybystyq júıesi bar jyljymaly medısınalyq keshender tabystalǵan bolatyn. Qazir olar el ıgiligine qyzmet etip jatyr», dedi ol.
Atap aıtsaq, qordyń qoldaýymen sırek aýrýlary bar 11 pasıent 1,2 mlrd teńgeden asa somaǵa dári-dármekpen qamtamasyz etilgen. Uryqtyń damý aqaýlaryn erte anyqtaý boıynsha shetelde eki dáriger oqytylsa, múıiz qabyǵyn transplantasııalaýdy qajet etetin kózi naýqas 9 pasıentke 9,1 mln teńge somasynda qaıyrymdylyq kómek kórsetilgen.
Aldaǵy ýaqytta qormen birlesip densaýlyq saqtaý salasyna qatysty taǵy 3 jobany iske asyrý qarastyrylyp otyr. Atap aıtqanda, Kegen aýdanynda 2 balalardy ońaltý ortalyǵyn, «Káýsar» oblystyq ońaltý ortalyǵyn ashý jáne oblystyq balalar klınıkalyq aýrýhanasyn neırohırýrgııalyq jabdyqtarmen qamtamasyz etý josparlanǵan.
Jańa ortalyqta bilikti dárigerler, nusqaýshylar, logoped, reabılıtologterden quralǵan 68 mamannyń kómegimen 200-ge jýyq bala keshendi em alady. Oǵan tolyq múmkindik bar. Ońaltý sharalary kúndizgi ýaqytta júrgiziledi. Aptasyna bes kún jumys isteıtin ortalyqtyń biregeıligi – ár balaǵa jeke mán berilip, ata-anasynyń balasymen birge bolýyna qolaıly jaǵdaı jasalynǵan. Ortalyqtyń ashylý barysynda qaıyrymdy azamattar Neuro-MSX TMS (transkranıaldy magnıttik stımýlıator), muǵalimderge arnalǵan jıhazdar, ottegi konsentrattary men zamanaýı kompıýterlerdi syıǵa tartty.
Budan keıin «Qazaqstan halqyna» QQ ókilderi Talǵar qalasyndaǵy S.Seıfýllın atyndaǵy №2 orta mektepke baryp, oqytýdyń jańa ınnovasııalyq ádisterimen tanysty.
Almaty oblysy
