«Qazaq mıfteri men ertegileriniń jelisinde balalar spektaklin qoıýǵa daıyndalyp jatqanymyzda Baqyt Qaıyrbekov túrli aýyrtpashylyq pen taǵdyr talaıyna qaramastan barlyq kedergini eńsere bilgen Shúıgin shóp eliniń Ot hanshaıymy týraly sıýjetti qysqa-nusqa baıandap bergen bolatyn. Osy ápsananyń ózi halqymyzdyń boıyndaǵy ómirlik kúsh-qýatyn ańǵartsa kerek», deıdi qoıýshy rejısser Mýkaram Avahrı.
Balet Shúıgin shóp elinde bolǵan oqıǵany sýretteıdi. Mergen esimdi jas jigit pen Ot hanshaıymy jáne onyń ata-anasy – Kún qudaıy Kúnsulý men Táńir birlesip jumyr jerdi topan sý men máńgilik aıazdan, ajdaha Juttyń qaharynan qutqaryp qalady. Kez kelgen ertegidegi sııaqty munda da jaqsylyq zulymdyqty jeńip, kórermen qaýymǵa izgilik pen ǵajaıypqa toly álemdi pash etedi.
«Ot qyz» – kompozıtor Karına Abdýllınanyń teatrymyzda sahnalanǵan ekinshi týyndysy. Bul joly oǵan úlken jaýapkershilik júkteldi. Sebebi bolmysy san qyrly keıipkerlerdiń ǵana emes, qoıylym taqyrybyn asha túsetin partıtýra shyǵarýy kerek bolatyn. Balet mýzykasy, rasynda da, óte áserli boldy. Yrǵaǵy erekshe, ulttyq naqyshtaǵy áýenderi qulaqqa jaǵymdy ári birden jadyńda jattalyp qalady», deıdi teatrdyń kórkemdik jetekshisi Nurlan Kanetov.
Balette Ot qyzdy – Darına Qaırasheva, Mergendi – Erqanat Ermaǵambet, Mergen sýyrdy – Artemıı Seıalov, Daýyldy – Ýeslı Karvalo, Aıdy – Rıza Qanatqyzy, Kúnsulýdy Áıgerim Kelemedenova bastaǵan akterler ansambli joǵary dárejede oryndap shyqty.
Sonymen qatar aıtýly qoıylymnyń ssenografııasy da ásemdigimen kóz tartady. Zamanaýı, túrli tehnıkalyq jáne mýltımedıalyq sheshimi de qyzyqty, al kostıýmderi kórkemdigimen kóńil baýraıdy. Týyndynyń taǵy bir mańyzdy ereksheligi – horeografııasy. Kópshilik sahnalar men dýetterde Mýkaram Avahrıdiń tabysty izdenimpazdyǵy ańǵaryldy. Bir qaraǵanda qarapaıym kórinetin qımyldar ár keıipkerdiń kórkem beınesin asha túskeni sózsiz.
