Taǵylymdy sharany ótkizýge uıytqy bolǵan – «Alash.kz» ulttyq portaly. Is-shara barysynda zııaly azamattar Alash kóseminiń ómir joly men eńbegine toqtalyp, parasatty oı órbitti. Respýblıkalyq «Ardagerler uıymy» ortalyq keńesi tóraǵasynyń birinshi orynbasary О́mirzaq Ozǵanbaı ult múddesi jolynda basyn báıgege tikken tulǵalarymyzdy ulyqtaý – eldigimizdiń belgisi ekenin aıtty.
«Álekeń «Han balasynda qazaqtyń haqysy bar. Tiri bolsam, qazaqqa qyzmet qylmaı qoımaımyn», dep beker aıtqan joq. Ol barlyq sanaly ǵumyryn halqymyzǵa qyzmet etýge arnady. Sol ustanymnan eshqashan taıǵan emes. Qandaı qaısarlyq! El múddesi jolynda qyrýar jumys atqardy. Alash avtonomııasyn quryp, Alashorda úkimetiniń tóraǵasy boldy. 20-jyldardyń ortasynda eki ret tutqyndalyp, túrme azabyn tartty. Odan keıin Máskeýge jer aýdarylyp, on jyldan asa myrzaqamaqta otyrdy. Osynyń bári ult kósemin moıyta almady», dedi ol.
Al alashtanýshy ǵalym Tursyn Jurtbaı qytymyr qystyń ózeginen shyǵyp, kóktemge bet alǵan maýsym sekildi Alash qozǵalysy da qatty qyspaqtan, janshýdan, sanalyq quldyqtan, qalyń qardyń astynda qalǵan qazaqtyń tamyryn oıatyp, keleshekke bastaǵanyn beınelep jetkizdi.
«Sonyń ishinde biz taǵzym etip otyrǵan ult kósemi dárejesine kóterilip, elin erteńge bet aldyrǵan Álıhan Bókeıhan sekildi saıası tulǵalar oǵan deıin de, odan keıin de qazaq saharasynda áli shyqqan joq», dese, qoǵam qaıratkeri Álıhan Baımenov aıtýly tulǵanyń bekzat bolmysy men eńbegi týraly áńgimeledi.
Budan keıin is-shara shahardaǵy Á.Bókeıhan atyndaǵy №76 mektep-lıseıi men «Qara shańyraq» qoǵamdyq birlestigi ótkizgen «Rýhqa taǵzym» atty keshke jalǵasty. Onda Alash arysy týǵan topyraqta ómirge kelgen ólketanýshy Tuńǵyshbaı Muqan qarııamen mektep muǵalimderi men oqýshylar kezdesip, suhbattasty. Sondaı-aq olarǵa T.Muqan aǵamyzdyń avtorlyǵymen shyqqan «Álıhan Bókeıhan – ult-azattyq kúreskeri» atty derekti fılm kórsetildi.
