Bilim izdeýden jalyqpaımyn

Buǵan deıin jaqyndarymnyń ishinde esh­biri qarjy salasynda qyzmet etpegen. Eýropalyq qaıta qurý jáne damý bankiniń seriktestik damý baǵdarlamasy ar­qa­synda alǵash ret kommersııalyq bankke jumysqa orna­lastym. Bul baǵdarlama maǵan qarjylyq tal­daýdyń jáne kásipkerlerge nesıe berý erek­shelikterin túsinýdiń óte jaqsy negizin qalyp­tas­tyrdy.

Jumys barysynda jańa táýekelderge, jańa qıyndyqtarǵa árkez tap bolamyz. Min­det­terdi tabysty sheshe alý úshin ár­daıym damyp, jetilip otyrý, bilim alýdan jalyqpaý óte mańyzdy. Sońǵy ýaqytta bolǵan kúrdeli ári aýqymdy keısterdiń biri – SentrKredıt Banki men ECO Center Bank-tiń birigýi boldy. Biz bul úderisi óte qysqa merzimde júzege asyr­dyq. Klıentterge qolaısyzdyq týdyrmaı eki iri banktiń júıesin, úderisterin jáne port­felin biriktirý óte qıyn, árıne. Alaıda bizdiń komanda bul mindettiń údesinen shyǵa aldy.

Kásibı mansabymda alǵash sol kezdegi ekinshi deńgeıli bankter (EDB) arasynda TOP-2-ge kiretin elimizdiń eń iri bank­te­riniń birinde jumys istedim. Qazir ol bank naryqta joq. Ol jer­de men zań­dy tulǵalarǵa nesıe berý boıynsha jaq­sy tájirıbe jınadym jáne táýekel-mened­jment boıynsha mansabymdy bastadym. Ekinshi jumys ornym Qazaqstannyń EDB TOP-8 quramyna kiretin kishi bank boldy, onda men táýekel-menedjer retinde jumys istedim jáne birneshe jyl ishinde maman pozısııasynan táýekel-menedjment blogynyń atqarýshy dırektory laýazymyna deıin óstim.

SentrKredıt Banki 2018 jyly Nesıe táýekeli departamentine basqarýshylyq laýazymǵa shaqyrdy jáne men Basqarma tóraǵasymen aqyldasa otyryp, bul usy­nysty qabyl aldym. Jumys istegen árbir bankte ózindik oń erekshelikter men kúshti jaqtary boldy, biraq qazirgi jumys ornymda kor­po­ratıvtik mádenıettiń qyr-syryn, syn-qater­ler men táýekelderge oraıly kózqarasty, klıentke baǵdarlanýdy, ınnovasııalarǵa daıyn­dyqty, óz qundylyq­taryma adaldyqty anyq sezindim. Ujym men basshylyqtan da qol­daýdy taptym.

Bank qyzmetindegi táýekelder san qyrly: qarjylyq táýekelden basqa operasııalyq táýekel, nesıe táýekeli, portfel táýekeli, kompleans-táýekel, aqparattyq qaýipsizdik táýekeli jáne basqa da syn-qaterler bar. Shyn máninde, banktiń barlyq qarjylyq qyz­meti turaqtylyqty arttyrý jáne tabys tabý maqsatynda táýekelderdi basqarý bolyp sanalady. Bizde táýekelderdiń árbir baǵytyn óz isiniń mamandary basqarady, bul banktiń qar­jylyq kórsetkishterinen aıqyn kórinedi.

Bank shaǵyn jáne orta kásipkerlerge kredıt berýdi damytýǵa aıtarlyqtaı kúsh jumsady jáne qazirgi ýaqytta ShOB úshin, onyń ishinde memlekettik baǵdarlamalar sheńberinde jyldam ónimderdi usyný bo­ıynsha kóshbasshy bolyp sanalady.

Tabıǵat oıanatyn, túrlenetin jáne barsha áıel qaýymy qulpyryp shyǵa keletin kóktem merekesin aıryqsha jaqsy kóremin. Meniń esimim de osy merekeniń negizin qalaý­shy­lardyń biri sanalatyn Klara Setkınmen attas, tıisinshe osy kúni óz esimime qatysty kóp ázil de estip jatamyn. Klara Setkın qalyp­tastyrǵysy kelgen merekeniń máni áıel teńdigi úshin kúres boldy jáne ol qazir de ózekti bolyp qala beredi. Degenmen náziktik pen sulýlyqty dáripteıtin qazirgi máni de maǵan unaıdy.

Merekede eń birinshi anamdy quttyq­taımyn, ony jaqsy kóretinimdi aıtamyn. Sosyn súıikti ápke-sińilderimdi, qur­by­la­rymdy, áriptesterimdi quttyq­taımyn. Árıne, túrli spa-prosedýralar qabyldap, de­­ma­lyp, serýendep, mereke kúni ózime de jaǵ­daı jasaýǵa tyrysamyn.

Qazaqstannyń qarjy sektory aldyna úlken maqsat qoıǵan áıelderdiń damýy úshin mol múm­kindik ashyp jatyr dep esepteımin. Bul sózime qarjy salasynda aıtarlyqtaı jetis­­tikke jetip júrgen áıel azamattar dálel bola alady.

Klara Ermakbaeva,

SentrKredıt Banki Táýekel-menedjment ortalyǵynyń basqarýshy dırektory