Sport • 10 Naýryz, 2024

Jarys kúndeligi

80 ret

kórsetildi

3 mın

oqý úshin

Máskeýde shahmattan «Aeroflot Open – 2024» týrnıri ótip, oǵan álemniń birqatar memleketten kelgen 500-den asa oıynshy qatysty. Atalǵan jarys Qazaqstannyń daryndy shahmatshysy Bıbisara Asaýbaevanyń aıqyn jeńisimen aıaqtaldy. О́zge shahmatshylarymyz mynadaı oryndardy ıelendi: Qazbek Nógerbek – 18, Danıal Sápenov – 21, Ramazan Jalmahanov – 38 oryn jáne Álisher Súleımenov – 56-oryn.

Ǵalym SÚLEIMEN

Reseıdiń «Nashe delo» promoýterlik kompanııasy Sankt-Peterbýrgte jekpe-jektiń birneshe túrinen dúbirli doda uıymdastyrdy. Neva jaǵalaýyndaǵy jarystyń basty básekesinde Orynbordyń qazaǵy Damır Ismaǵulov pen Reseıdiń týy astynda óner kórsetip júrgen armıan sportshysy Edýard Vartanıan kúsh synasty. Kıkbokstiń erejesi boıynsha ótken kezdesýde ekeýi de aıanbaı aıqasty. Biraq tóreshilerdiń búıregi Edýardqa burdy. Úshinshi raýndta olar Ismaǵulovqa nokdaýn belgiledi. Damır óz narazylyǵyn bildirdi. Biraq qazylar oǵan qulaq aspady. Aqyry Vartanıan basym tústi. Jeńistiń qyzýy basylmaı turyp Reseı faıteri Damır Ismaǵulovty MMA erejesi boıynsha kúsh synasýǵa shaqyrdy. Eger reti kelse, bul jekpe-jektiń Qazaqstanda ótýi de múmkin ekeni aıtyldy.
Fýtboldan Qazaqstan chempıonatynyń ekinshi týr oıyndary mynadaı nátıjelermen aıaqtaldy: «Jetisý» – «Astana» 0:2, «Qaısar» – «Qyzyljar» 0:3, «Atyraý» – «Ordabasy» 1:1, «Tobyl» – «Elimaı» 4:2, «Jeńis» – «Shahter» 1:0, «Turan» – «Qaırat» 0:0. Eki kezdesýden keıin 100 paıyzdyq kórsetkishke qol jetkizgen «Tobyl» men «Astana» jarys kestesinde kósh bastap keledi. «Ordabasy» men «Qaırattyń» olardan eki upaıy kem.
Tennısten Qazaqstan quramasynyń kapıtany Iаroslava Shvedova óz qyzmetinen ketip, onyń ornyna Iýrıı Shýkın taǵaıyndaldy. 44 jastaǵy maman 2008-2014 jyldar aralyǵynda ulttyq komandamyzdyń sapynda óner kórsetti. Rolan Garros pen Aýstralııanyń ashyq birinshiliginde oınap, ATR reıtınginde 119 orynǵa deıin kóterildi. Keıingi kezderi Shýkın Shvedovanyń kómekshisi boldy.
Saýd Arabııasynyń astanasy – Er-Rııadta kásipqoı boks keshi ótti. Basty básekede asa aýyr salmaqta aıqasatyn fransııalyq Fransıs Nganný men ulybrıtanııalyq Entonı Djoshýa judyryqtasty. Alǵashqysy – aralas jekpe-jektiń has sheberi, UFC-diń eks-chempıony. Ekinshisi – bokstan Olımpıada chempıony, kásipqoı bokstan álemniń eks-chempıony. Bul aıqasta Djoshýa Ngannýdy ekinshi raýndta nokaýtqa jiberdi.
Fýtboldan Qazaqstannyń jasóspirimder quramasynyń (U-15) aǵa jattyqtyrýshysy bolyp 64 jastaǵy aǵylshyn mamany Stıýart Hall taǵaıyndaldy. Ol ár jyldary óz elinde, Úndistan, Sent-Vınsent pen Grenadın, Zanzıbar, Tanzanııa, Rýanda, Kenııa, Bangladesh, Efıopııa jáne Fılıppınde eńbek etti. Sonymen qatar, Hall elimizdegi balalar men jasóspirimder fýtbolyn damytýǵa baǵyttalǵan «High Performance» baǵdarlamasyna jetekshilik etedi.