1/8 fınaldyq saıysty Alýa Balqybekova (50 kg) bastady. Ol Ońtústik Koreıanyń ókili Djo Hıon Djýndy esh qınalmaı jeńdi. Kóp keshikpeı Sáken Bıbosynov (51 kg) Bahreınniń namysyn qorǵap júrgen qandasymyz Azat Mahmetovpen qolǵap túıistirdi. Bir-biriniń qyr-syryn jaqsy biletin boksshylardyń óneri kórermenderdiń kóńilinen shyqty. Joǵary qarqynda ótken saıys Sákenniń paıdasyna sheshildi.
Nurbek Oralbaı (80 kg) men Alekseı Alferovtiń aıqasy da Býsto-Arsısıodaǵy sport keshenine jınalǵan jankúıerlerdi birden ózine baýrap aldy. Biri – 2023 jylǵy álem chempıony, ekinshisi – 2021 jylǵy álem birinshiliginiń fınalısi. Alǵashqy raýndta Belarýs elinen kelgen bylǵary qolǵap sheberiniń sál ǵana basymdyǵy baıqaldy. Odan keıin tizgindi qolyna myqtap ustaǵan Nurbek jeńisti qarsylasynyń ýysynan julyp áketti.
Keshki baǵdarlamada taǵy eki jerlesimiz 1/8 fınaldyq básekelerin ótkizdi. Mahmýd Sabyrhan (57 kg) Pýerto-Rıkonyń ókili Kaleb Tıradony tize búktirse, Aslanbek Shymbergenov (71 kg) túrikmenstandyq Baıramdýrdy Nurmuhammedovtan basym tústi.
Alda – shırek fınal. Al Olımpııa oıyndarynyń joldamasy tek jartylaı fınalǵa shyqqan boksshylarǵa beriletinin eskersek, jerlesterimizge taǵy bir jekpe-jekte jeńiske jetý qajet. Tek sonda ǵana olar Parıj rınginde kúsh synasý qurmetine ıe bolady.
