Venada ornalasqan kartel óziniń aı saıynǵy esebinde munaıǵa degen suranys 2024 jyly kúnine 2,2 mıllıon barrelge jáne 2025 jyly kúnine 1,8 mıllıon barrelge ósedi dep kútetinin aıtty, bul onyń burynǵy baǵalaýlarynan ózgeshe emes.
«Iri ekonomıkalardaǵy oń, turaqty dınamıkany kútý 2024 jáne 2025 jyldar ishinde jalpy ınflıasııanyń odan ári tómendeýin kútýmen qamtamasyz etiledi. Bul kiris deńgeıin jaqsartady jáne tutynýshylardyń shyǵys múmkindikterin saqtaıdy dep boljanady», dep málimdedi OPEK.
Halyqaralyq etalon bolyp sanalatyn «Brent» markili munaı qazir barreline 82 dollarǵa jýyq deńgeıde satylyp jatsa, WTI munaıy barreline 78 dollarǵa baǵalanyp tur.
OPEK pen onyń odaqtastary ekinshi toqsanda kúnine 2,2 mln barrel kóleminde óndiristi erikti qysqartýdy uzartýǵa kelisken bolatyn. Sol arqyly jahandyq tapshylyqtyń aldyn alyp, baǵany qoldamaq. О́ndiristi erikti qysqartý kelisimine Qazaqstan da qatysady. Bıyl qańtarda respýblıkada shıki munaı óndirý 6,7 mln tonnany quraǵan. Bul byltyrǵydan 3,2%-ǵa az kórsetkish. О́ndirilgen munaıdyń eń kóp kólemi Atyraý oblysyna (4,6 mln tonna, -2,4%) tıesili. Odan keıin Mańǵystaý (1,4 mln tonna, -1,4%) jáne Aqtóbe (360,6 myń tonna) oblystary tur. Qarjylaı eseptesek, óndiris kólemi 1,3 trln teńgeni quraǵan. Bul 2023 jyldyń qańtarymen salystyrǵanda 9,7%-ǵa az. О́tken jyly qańtar-jeltoqsanda munaı óndirý 77,6 mln tonnaǵa jetken edi.
Jalpy, Qazaqstan ekinshi toqsanda munaı óndirýdi táýligine 82 myń barrelge qosymsha erikti qysqartý merzimin uzartady. Energetıka mınıstrliginiń habarlaýynsha, óndiristi qosymsha qysqartý munaı naryǵyndaǵy turaqtylyq pen teńgerimdi saqtaý maqsatynda OPEK+ elderi qabyldaǵan saqtyq sharalaryn kúsheıtýge arnalǵan.
Eldegi óndiriletin munaıdyń basym bóligi, ıaǵnı jalpy kólemniń 90%-dan astamy eksportqa shyǵarylady. Byltyr qańtar-jeltoqsanda munaı eksporty 8,4%-ǵa ósip, 70,7 mln tonnany qurady jáne odan 42,3 mlrd dollar tabys tústi.
«TMD elderine (Ázerbaıjan, О́zbekstan jáne Reseı) 123,3 mln dollarǵa 242,8 myń tonna munaı jóneltildi. Fızıkalyq mándegi ósim 4,1%-dy qurady, aqshalaı eseptegende, kerisinshe, 17%-ǵa tómendeý baıqalady. Dúnıejúzine jiberilgen munaı kóleminiń ósimi 8,4%-dy qurady, aqshalaı túrde 9,8%-ǵa tómendeý tirkeldi. Qazaqstan munaıynyń basym bóligi Italııaǵa jetkizildi», dep habarlady «EnergyProm».
