Surmergen

Elde únemi atyp júrgen myl­tyǵy da, kózdeıtin nysana­sy da qarapaıym, qarabaıyr dúnıe­ler eken-aý. Álem kýboginde jaǵdaı ózgeshe. Myltyqtary – sońǵy úlgidegi minsiz quraldar. Nysanalary da bizdegideı úlbi­regen qaǵaz emes. Jańa myltyqqa mashyqtanyp úırený úshin de ýaqyt kerek. Al jarys kútip turmaıdy ǵoı. Nar táýekel degen ishteı. Erkin Tileýqabyluly er minezdi qazaqtyń osy bir sózin ishteı jaqsy kóredi. О́zi de táýekel etip tas jutýǵa ámanda daıyn. Al qıyndyq ataýlyny keziktirip turǵany búgin ǵana emes qoı. Emenniń ıir butaǵyndaı jaratylysynan myǵym jigit taǵdyrdyń tálkegin kópten beri kóterip keledi emes pe?

Qyrsyq deımiz be, joq álde jazmysh pa eken, kátepti qara nar ǵana kóteretin zilmaýyr sal­maq sonaý 2006 jyly kezikken. Kezik­kende de endi qaıtyp aıyryl­mastaı, qadam basyp júrgizbes­teı, aldaǵy bar úmitin kókteı sol­dy­rardaı boldy emes pe?! Oblys ortalyǵyndaǵy qurylys jumy­synda jazym bolyp, toǵyzyn­shy qabattan quldılap qulap ketken. Kórer jaryǵy bar eken, áıtpese ekinshi, ne úshinshi qabat emes, tý sonaý toǵyzynshy qabat. Oblystyq aýrýhanada operasııa jasaldy. Endi qaıtyp aıaǵyn basa almaıtyny belgili boldy. «Basqa tússe baspaqshyl» de­mek­shi, taǵdyrdyń salǵan isine kón­dikken. Keıin halyqqa qyzmet kórsetý ortalyǵyna ornalasqan. Almaty ekonomıka jáne statıstıka ınstıtýtynyń Kókshetaý fılıalyn bitirip mamandyq alǵany kádege asty.

Qolarbaǵa tańylyp qalǵannan keıin bir-aq bildi. Qurylys fırmasy oıda joq jerde múmkindi­gi shektelip qalǵan adamǵa zań bo­ıynsha tólenetin járdemaqy bergisi kelmegen. Des bergende toǵyzynshy qabattan qulaǵanda qalta telefony synbaı aman qalypty. Jumys bastalardyń aldynda Erkin qurylys alańynyń tastaı qarańǵy, qorshaýdyń túbi bosap, shaıqalyp turǵanyn túsirip alǵan. Keıin sotta qaralǵan kezde dálel bolyp shyqty. Aýyl­dastaryna aıtar alǵysy da az emes. Ádildikke jetý úshin olar da atsalysty. Ásirese shoq juldyzdaı Qaraózek aýylynyń týmasy, sol kezdegi oblystyq máslıhattyń depýtaty bolyp júrgen Nartaı Ysqaqov aǵasy shyndyqqa jetý úshin janyn salyp kirisken.

Baspananyń zary ótken soń «Amanat» partııasy Aqmola ob­lys­tyq fılıalynyń sol kezdegi tór­aǵasy Ǵalym Bekmaǵambetovke jolyǵyp, ótinish aıtqan. Ǵalym Mádeshuly oblystyq máslı­ha­ttyń depýtattar korpýsyna jaǵ­daıdy túsindirip, kómek qo­lyn sozýyn surady. Janashyr jandardyń arqasynda úsh bólmeli páterge ıe boldy. Bul jaı da Erkindi qanattandyra tústi. Birde ózi tárizdi taǵdyrdyń tálkegine túsken Kókshetaýdaǵy «Aqnıet» múgedekter qoǵamdyq birlestiginiń tóraıymy Qymbat Dosmaǵanbetova sportpen aınalysý týraly keńes bergen. Mine, sodan beri myl­tyq atýmen shuǵyldanyp keledi. Oblys ortalyǵyndaǵy №4 orta mektep ǵımaratynda «Mergen» sport klýby bar. Osy klýbta jat­tyǵady. 2022 jyly Qazaqstan chem­pıonatynda top jardy. 2023 jyly paralımpıadalyq oıyndarda birinshi orynǵa ıe boldy. Bul joly Úndistanda qazaq eli­niń atyn shyǵardy. 619 upaı jı­nap­ty, al álemdik rekord – 631 upaı.

– Sporttyq kerek-jaraǵymyz túgel bolsa, namysty qoldan bermes edik, – deıdi sportshynyń ózi. – Baǵzy zamanda Alashtyń qura­laı­dy kózge atqan mergen­deri jaq­qa jebeni salyp turyp «tarta al­masam – maǵan sert, tımeı ket­seń – saǵan sert» deıdi eken ǵoı. Biz­de de solaı. Osy joly órke­nıet­ti elderdiń sportshy­laryn kórip qyzyqqanymyzdy nesin jasy­raıyq. Standartqa saı sporttyq kıimi, atatyn myltyǵy men tapanshasy, oǵyna deıin ózgeshe.

Attyǵa erip jaryssa da keýde­sinde namys oty janǵan kók­shetaýlyq sportshy báıge sońynda shań qaýyp qalmaı, aldyńǵy lekten kóringen. Jalaýy jelbirep kelgen sportshyny kókshetaýlyq tilektes qaýym kúre joldyń boıyndaǵy Qulager eskertkishiniń janyndaǵy at arqasyndaı alań­qaıda qarsy aldy. Jattyqtyrýshysy Músilim Sársembekov qııandaǵy jarystyń qalaı ótkenin taratyp aıtyp berdi. Týǵan aýyly Qaraózekten jetken qaýym astyna at mingizip, ıyǵyna shapan japty. Jazǵy paralımpıada oıyndarynda jeńiske jetýdi tiledi. Kózdegeni múlt ketpeıtin surmergen nysanasyna dóp tıgizerine biz de sendik. Erkinniń nysanasy myltyqtyń qaraýylyna ilinetin kádimgi nysana ǵana emes, óz boıyndaǵy qajyr men qaırattyń, erlik pen órliktiń jas tolqynnyń boıyna darytsam degen adal nıeti. Biz surmergenniń bul jolda da múlt ketpeıtinine kámil sendik.

Kókshetaý