Foto: vıdeodan alynǵan kadr
Turǵyndar, áýeli, máselesin aıtyp Selınograd aýdanynyń ákimi Baqytbek Ospanbekovke júgingen.
Talaby oryndalmaǵan qoıandylyqtar kúre joldy jaýyp tastady. Olar, tipti, aýdan ákimine Tótenshe jaǵdaı jarııalanbaı, talap-tilegi oryndalmaǵan jaǵdaıda joldy jaýyp tastaıtyndaryn da eskertipti.
Derekkóz jarııalaǵan beınejazbada aýyl turǵyndarynyń: «Qoıandyǵa jaǵdaı jasalsyn. Qys bitip, kún raıy jylyǵanda jyl saıyn balshyqqa batyp qalamyz. Jumysyn oryndaı almaǵandar laýazymyn bosatsyn», degen sózderin estýge bolady.
Qoıandylyqtar ýákiletti oryndardyń aýyldy qarǵyn sý basyp qalý máselesin jyly-jumsaq jetkizip jatqandaryna da narazy.
«26 naýryz. Búkil halyq ákimdik aldyna jınaldyq. Bizdiń talap – jergilikti jerde tótenshe jaǵdaı engizý. Aýylymyz sý astynda qaldy. Sý neshe úıge kirdi? Olar ótemaqyny qalaı óteıtinin aıtpaıdy. Kólik kerek, kómek kerek, sýdy sorǵyzatyn adamdar kerek. Qys boıy qardy tazalamaýdyń saldaryn búgin kórip otyrmyz», dedi aýyl turǵyny.
Tótenshe jaǵdaılar mınıstrligi Qoıandy aýylyndaǵy qarǵyn sý basqan aýmaqtyń masshtabyn naqty jarııalamady. Degenmen 27 naýryz tańǵy saǵat 6 shamasynda 80 myń tekshe metr erigen sý tartylǵanyn habarlady.
«Aqmola oblysy men Astana qalasy TJD jáne JAO 17 tehnıkasy, 76 adamy jáne 18 motopompasy jumyldyryldy. Jaǵdaı qalypty», dedi Aqmola oblysy TJD bastyǵy Qanat Dospaev.
