Sýretti túsirgen – Pavel Mıheev
Jýrnalıst shańǵyshylardyń halyqaralyq klýby bar, bul SCIJ (The Ski Club of International Journalists) dep atalady. Jyl saıyn ár elde otyrysy ótedi. Bıylǵy 69-otyrysty ótkizý mártebesi Qazaqstanǵa buıyrdy. Álemniń ár qıyryndaǵy 30-ǵa tarta elden kelgen 150-ge jýyq jýrnalıst apta boıy Alataý bókterinde aıaldady. Jalpy, jýrnalıst shańǵyshylardyń halyqaralyq klýbynyń otyrysyn ótkizý tek jarys uıymdastyryp, shúlen taratqandaı moıyndaryna medal ilip qoıa berý emes. Basty maqsat – týrızmdi dáripteý. Almatyǵa at baılaǵan jýrnalıster apta ishinde Shymbulaqtyń bókterinde syrǵanap qana qoıǵan joq, aldy Túrkistanǵa deıin qydyryp baryp elimizdiń kórikti jerlerin tamashalap, táý etip qaıtty. Qazaqtyń salt-dástúri men ádet-ǵurpyna qanyqty, mádenıeti men rýhanııatyn kórdi.
Halyqaralyq klýb otyrysynyń saltanatty ashylý rásiminde sóz alǵan Týrızm jáne sport vıse-mınıstri Serik Jaraspaev bul is-shara shetelden kelgen meımandarǵa elimizdiń týrıstik oryndaryn aralatyp tanystyrýǵa tamasha oraı ekenin aıtty. «Shymbulaq» taý-shańǵy keshenindegi keleli keńes barysynda túrli kezdesý, jıyn da ótip, ulttyq taǵamdarymyzdy tanystyrý, eldiń ózegi sanalatyn qundylyqtar da aıtyldy. «Kazakh Tourism» ulttyq kompanııasy bas seriktes bolyp, Almaty qalasynyń ákimdigi qoldap ótkizgen aýqymdy is-sharanyń sharapaty ishki týrızmdi túletýge tıetini sózsiz.
Shańǵyshy jýrnalısterdiń múshesi Slovenııadan kelgen Albına Podbevsektiń jasy – 82-de. Shańǵyny boıjetken shaǵynan tebedi eken. Seksenniń seńgirindegi shańǵyshy ájeımen tildeskenimizde«Shymbulaq jóninde bas barmaǵyn kórsetip, erekshe áser alǵanyn ańǵartty.
«Slovenııanyń Trıglav ulttyq parkiniń terrıtorııasyndaǵy Vogel taý-shańǵy kýrorty Shymbulaqqa qaraǵanda áldeqaıda alasa eken. Osyndaı muzart shyń basynan etekke qaraı quldılap túsý qandaı keremet. 82 jasqa kelip Qazaqstannyń kórkem tabıǵatymen tuńǵysh tanysyp otyrmyn. Maǵan erekshe áser etti. Eýropa elderinde, onyń ishinde bizdiń Trıglav shyńynyń bókterine qar erekshe qalyń jaýady. Syrǵanaý maýsymy keı jyldary sáýirdiń sońyna deıin sozylady. Munda da sondaı uqsastyqty baıqadym, Almaty qalasynda kún jylynyp, kóktemniń lebi esedi, al Alataýdyń bókterinde siri qary sol kúıi jatyr. Aldaǵy ýaqytta da dám tartsa, Qazaqstanǵa qydyryp kelýdi josparlap otyrmyn. Basqa elderdiń taý-shańǵy kýrorty qaladan tym shalǵaıda ornalasqan. Tipti 70-80 shaqyrym jer óndirip demalys ornyna jetesiz. Al Shymbulaq Almatynyń dál ıegi astynda, asa qashyq ta emes eken», dedi Albına Podbevsek.
SCIJ Qazaqstan klýby 2013 jyldan beri «Shymbulaq» taý-shańǵy keshenimen memorandým jasasyp, tize qosyp talaı sharýany júzege asyrdy. Sonyń ishindegi eleýlisi – osy dúnıejúziniń jýrnalıst shańǵyshylaryn jınap ótkergen basqosý. Bulaı deýge negiz de joq emes. Buǵan deıin halyqaralyq klýbtyń jyl saıynǵy otyrysy damyǵan elderdiń tańdaýly kýrortty keshenderinde ótkizilip keldi. 1955 jyldan beri 69 márte uıymdastyryldy. Pıreneı silemderindegi Baqueira-Beret taý-shańǵy kýrortynda (Ispanııa), 2006 jyly Týrın qysqy Olımpıadasyn ótkizýge úlesi tıgen Italııanyń Sestriere kesheninde, Fransııanyń Val Cenis Vanoise, Val d’Arly keshenderinde, Reseıdiń Roza Hýtor, Bolgarııanyń Pamporovo syndy taýly ólkesindegi kýrortty keshenderinde joǵary deńgeıde ótti. Al byltyr Kanadanyń áıgili Marble Mountain shıpajaıynda uıymdastyryldy.
«Shymbulaq» kompanııalar tobynyń bas dırektory Rınat Ábdirahmanov jýrnalıst shańǵyshylardyń halyqaralyq klýby Almatyǵa aıaldaýy elimiz úshin zor mártebe ekenin aıtty.
«Biz bul is-sharany óz deńgeıinde ótkizýge birneshe jyl ázirlik júrgizdik. SCIJ Qazaqstan klýbyna múshe jýrnalısterdiń Shymbulaq ekinshi úıi sanalady. Jyl saıyn qysqy maýsym ashylǵannan bastap jýrnalıster de kópshilikpen birge syrǵanap demalysyn ońtaıly ótkizip júr. Dúnıeniń ár qıyrynan kelgen jýrnalısterge qolaıly syrǵanaý soqpaǵyn ázirleýde de az jumys atqarylǵan joq. Munyń barlyǵy da elimizge týrıst tartýdyń qamy úshin júzege asyryldy», dedi R.Ábdirahmanov.
Jetpisjyldyq tarıhy bar jýrnalıst shańǵyshylardyń halyqaralyq klýbyna Qazaqstan 2013 jyldan beri múshe.
«Biz alǵash 2012 jyly Túrkııada ótken klýbtyń halyqaralyq jıynyna qonaq retinde qatystyq. 2013 jyly Italııa jerinde resmı túrde múshelikke qabyldady. Sol kezde SCIJ Qazaqstan klýbynyń músheliginde úsh jýrnalıst qana bar edi. On jyldyń ishinde qatarymyz artyp, 50-ge taıady. Halyqaralyq klýbtyń kezekti jıynyn Qazaqstanda ótkizýge usynys joldap talpynys jasadyq. Nátıjesinde, Qazaqstanda qysqy týrızmdi nasıhattaýdyń zor múmkindigi týdy. Jýrnalıst shańǵyshylar óz eline barǵan soń Qazaqstan jaıynda áserin bólisip, aınalasyna aıta júreri sózsiz. Bul – bizdiń on jyldyń bederindegi zor tabysymyz», dedi SCIJ Qazaqstan klýbynyń prezıdenti Irına Bajenova.
Igi is-sharaǵa jınalǵan jýrnalıst shańǵyshylar arasynda beıresmı álem chempıonaty sanalatyn halyqaralyq týrnır de uıymdastyryldy. Jas ereksheligine qaraı birneshe topqa bólinip báıgege túsken úzdikter arasynda áriptesterimiz de bar. Taý-shańǵy saıysynan Egor Ilın kúmis medal ıelendi. «Alataý» shańǵy-bıatlon kesheninde (Talǵar aýdany) ótken shańǵymen júgirý dodasynda jerlesterimiz top jardy. Suńqar Qarabalın men Egor Ilın óz toptarynda qara úzip kelse, Andreı Kýkýshkın qola medalǵa qol jetkizdi. Áıelder arasyndaǵy saıysta Natalıa Kachalova kúmis júldeger atandy. Shańǵy sportymen kásibı shuǵyldanyp, mansabyn aıaqtaǵan soń kommentatorlyqqa bet burǵan ıtalııalyq Lýıdjı Brechchıarolı de Qazaqstanǵa qaıta aınalyp soǵatynyn aıtty. Alpiniń ańǵarynda shańǵy tebetin kommentator Shymbulaqta shıyrlaǵan izi týraly jyly lepesin «elime jetkizemin» dep ketti.
